Իմ տեղակալին հարցաքննության են կանչել, իսկ ինձ հարցեր են ուղարկել գրավոր տեսքով, որոն ես պատասխանել եմ: Այս մասին հունիսի 15-ին ՀՀ կառավարության նիստից առաջ լրագրողների հետ զրույցում ասաց ՀՀ Պետեկամուտների կոմիտեի նախագահ Դավիթ Անանյանը:
Սա, ըստ նրա, սովորական գործընթաց է, ինչի մասին ինքը բազմիցս հայտարարել է: «Հայաստանի ազգային անվտանգության ծառայությունն իրականացնում է իր գործառույթները, եւ ցանկացած անձ, ով որեւէ տեղեկատվություն ունի, կարող է հարցաքննության հրավիրվել: Պարզապես այս դեպքում Պետական եկամուտների կոմիտեի նախագահի տեղակալի պաշտոնը բավականին կարեւոր է եւ հետաքրքրություն է առաջացրել հանրության շրջանում: Օրենքի առջեւ բոլորն են հավասար», - ասաց Անանյանը:
Հիշեցնենք, որ ավելի վաղ Հայաստանի ազգային անվտանգության ծառայությունը բազմամիլիոնանոց հանցավոր սխեմաներ էր բացահայտել ՀՀ Պետական եկամուտների կոմիտեի պաշտոնատար անձանց մասնակցությամբ: Հայտնի էր դարձել, որ 2017 թվականի օգոստոսի 1-ից մինչեւ 2018 թ. մայիսի 1-ը բեռնափոխադրումներով զբաղվող կազմակերպությունների ներկայացուցիչների միջոցով «Նորֆոլկ Քոնսալթինգ» ընկերությունը 37.6 մլն դոլար կանխիկ գումար էր ստացել, որից 26.4 մլն-ը՝ Հայաստան ներկրվող ապրանքների մաքսազերծման, իսկ 11.2 միլիոնը՝ տնտեսվարող սուբյեկտներին մատուցած ծառայությունների համար: Ընկերությունը պետական բյուջե չի վճարել շուրրջ 7 միլիոն դոլար: