Մոսկվայի կենտրոնում՝ Գոստինի դվորի մոտ, տաքսին բախվել է մարդկանց ամբոխին: Նախնական տվյալներով, 7 մարդ է տուժել: Ոստիկանությունը հայտնել է, որ վարորդը կորցրել է կառավարումը, հաղորդում է ՏԱՍՍ-ը:
Առողջապահության նախարարության մամուլի ծառայությունից հայտնել են, որ տաքսիի վրաերթի արդյունքում ութ մարդ վիրավորվել է: Յոթ տուժածները գտնվում են բավարար, մեկ կին` միջին ծանրության վիճակում: Նրանց թվում Մեքսիկայի 2 քաղաքացի կա: Դեսպանատունը հայտարարել է, որ նրանք ստացել են աննշան վնասվածքներ, «նրանց վիճակը նորմալ է»:
Գործակալության զրուցակիցի խոսքով, Իլյինկա փողոցի թիվ 4 տան տարածքում մեքենան բախվել է ճանապարհային նշանին, որից հետո վրաերթի ենթարկել մարդկանց:
«Մոսկվայի կենտրոնում տեղի ունեցած միջադեպի կապակցությամբ մենք տեղեկացնում ենք, որ Մեքսիկայի երկու քաղաքացիները թեթեւ վնասվածքներ են ստացել, նրանց առողջական վիճակը կայուն է», - ասվում է հաղորդագրությունում:
Վարորդը ձերբակալվել է եւ ոստիկանության բաժին տարվել: