ԱՄՆ-ն միգրանտների համար ճամբար չի դառնա: Այս մասին հայտարարել է ԱՄՆ նախագահ Դոնալդ Թրամփը՝ դեմոկրատներին մեղադրելով միգրացիոն օրենսդրության հարցով բանակցություններից հրաժարվելու համար, գրում է Reuters-ը:
«Մենք փախստականների տեղավորման օբյեկտ չենք դառնա: Նման բան չի լինի»,- Սպիտակ տանը Տիեզերքի հարցերով ազգային խորհրդի նիստի բացմանը հայտարարել է ԱՄՆ նախագահը:
«Ամերիկայի ձայնը» հիշեցնում է, որ Թրամփի վարչակազմը քաղաքականություն է ներդրել, որը պարտադրում է ձերբակալել ապօրինաբար ամերիկյան սահմանը հատող ցանկացած անձի, այդ թվում՝ նրանց, ովքեր ապաստան են որոնում: Իսկ քանի որ երեխաներին չի կարելի է ծնողների հետ ազատազրկման միեւնույն վայրերն ուղարկել, նրանց բաժանում են:
«Դեմոկրատները պետք է միավորեն ուժերը հանրապետականների հետ եւ անվտանգ սահմանների հարցով լուծում մշակեն: Մի սպասեք մինչեւ ընտրություններ, քանի որ պարտվելու եք»,- Twitter-ում գրել է Թրամփը:
Թրամփը ծրագրում է հանդիպել Ներկայացուցիչների պալատից հանրապետականների հետ՝ միգրացիայի հարցով երկու մրցակից օրինագծերը քննարկելու նպատակով: Երկուսն էլ նախատեսում են օրինական կարգավիճակ տալ հարյուր հազարավոր անօրինական միգրանտների, որոնք ԱՄՆ են հասել մանուկ տարիքում, ինչպես նաեւ լայնածավալ փոփոխություններ կատարել օրինական միգրացիայի եւ սահմանային անվտանգության ամրապնդման ոլորտում: Առայժմ հայտնի չէ, արդյո՞ք դրանցից գոնե մեկը բավակարար թվով ձայներ կստանա:
