Մանվել Գրիգորյանի պաշտպաններից Արսեն Մկրտչյանը չի ցանկանում գնահատել իր պաշտպանյալի նկատմամբ որպես խափանման միջոց կալանավորումն ընտրելու մասին դատարանի որոշումը: Լրագրողների հետ զրույցում Մկրտչյանն ասաց՝ «տրաֆարետ հիմնավորումներ» էին: «Սովորական, տրաֆարետ հիմնավորումներ են՝ խուսափել քննությունից, ազդեցություն ունենալ քննության վրա եւ այլն»,- նշեց պաշտպանը:
Սակայն Մանվել Գրիգորյանը, փաստաբանի հավաստմամբ, քննության վրա ազդելու մտադրություն չունի. «Անգամ ստեղծվեց իրավիճակ, երբ լրացել էր ձերբակալության 72 ժամը, դատավորը պահանջեց, որ ուղեկցողները դուրս գան դատարանի դահլիճից: Ես բացատրեցի իրավական հետեւանքները, որ մենք կարող ենք անգամ դատարանից դուրս գալ: Բայց Գրիգորյանն ասաց՝ որեւէ տեղ չունեմ գնալու»:
Արսեն Մկրտչյանը, միաժամանակ, նշեց, որ իր պաշտպանյալն առողջական լուրջ խնդիրներ ունի՝ հետագա կալանքը կրելու հետ անհամատեղելի հիվանդություններ: Ինչ վերաբերում է կալանավորման որոշումը վիճարկելուն: Ասում է՝ հիմքերը բազմաթիվ էին. «Օրինակ բերեմ՝ ես ունեմ նույն հոդվածներով մեղադրվող վստահորդներ, որոնք գեներալ չեն, բարձրաստիճան պաշտոնյաներն ու պատգամավորները նրանց մասին չեն խոսում, եւ նրանք ստորագրությամբ ազատության մեջ են հիմա»:
Պաշտպանը նաեւ կարծում է, որ որոշում կայացնելիս դատավորը հաշվի է առել հանրության տրամադրությունները:
«Անձամբ իմ վրա հանրային ճնշում զգում եմ, կարծում եմ՝ դատավորը նույնպես որոշում կայացնելիս դա հաշվի է առել: Իսկ Մանվել Գրիգորյանը լավ է տրամադրված: Ասում է՝ անկախ նրանից, թե ինձ ոնց են վերաբերվում, եթե կան ինչ-որ բաներ, որ պետք է պարզվեն, թող պարզվեն»,- նշեց Արսեն Մկրտչյանը:
Հիշեցնենք, որ Երեւան քաղաքի ընդհանուր իրավասության դատարանի (Ավան եւ Նոր Նորքի նստավայր) հունիսի 19-ի որոշմամբ ԱԺ ՀՀԿ խմբակցության պատգամավոր, ԵԿՄ նախագահ Մանվել Գրիգորյանի նկատմամբ որպես խափանման միջոց ընտրվեց կալանավորումը: Ավելի վաղ Ազգային ժողովը համաձայնություն տվեց, որ Մանվել Գրիգորյանի նկատմամբ քրեական հետապնդում իրականացվի եւ նրա նկատմամբ կալանք կիրառվի:
Ավելի վաղ NEWS.am-ը հայտնել էր, որ Մանվել Գրիգորյանը ձերբակալվել է հունիսի 16-ին՝ Ազգային անվտանգության ծառայության խուզարկություններից հետո ապօրինի կերպով զենք եւ ռազմամթերք պահելու համար: Ազգային անվտանգության ծառայության նախօրեին տարածած տեսանյութի համաձայն, Հանրապետական պատգամավոր, գեներալ Մանվել Գրիգորյանի տանն ու նրան պատկանող տարածքներում հայտնաբերվել են մեծ քանակությամբ ռազմամթերք ու թանկարժեք մեքենաների հավաքածուներ, ինչպես նաեւ երկու տարի առաջ՝ ապրիլյան պատերազմի ժամանակ, բանակին որպես օգնություն ուղարկված շտապօգնության մեքենա, սնունդ, հագուստ ու այլ իրեր: