![](img/news/45/77/26/default.jpg)
Ես հարգում եմ անմեղության կանխավարկածը, սակայն անհրաժեշտ է պայքարել նման երեւույթների դեմ, որպեսզի Մանվել Գրիգորյաններ այլեւս գոյություն չունենան: Այս մասին հունիսի 20-ին լրագրողների հետ հանդիպման ժամանակ հայտարարեց «Մարդկային զարգացման միջազգային կենտրոն» հասարակական կազմակերպության նախագահ Թեւան Պողոսյանը՝ մեկնաբանելով Հայաստանի Ազգային անվտանգության ծառայության վերջերս տեղի ունեցած սկանդալային բացահայտումները:
Ինչ վերաբերում է Մանվել Գրիգորյանի ղեկավարած «Երկրապահ» կամավորական միությանը, ապա, ըստ Պողոսյանի, այն պետք է վերափոխվի եւ դառնա մի կառույց, որի դրական նշանակությունն իր վրա կկարողանա զգալ հանրապետության յուրաքանչյուր քաղաքացի: Ընդ որում, նա շեշտեց, որ նախկինում մարդիկ, ովքեր դառնում էին այս կազմակերպության անդամ, ժամանակի հետ սկսում էին իրենց առանձնահատուկ համարել, որոշակի առավելություն էին զգում եւ իրենց թույլ էին տալիս անել, ինչ ուզում էին: «Գայթակղությունը մեծ էր, եւ մարդիկ չդիմացան: Նրանք հերոսներ էին, մի քիչ հարստացան, եւ տեղի ունեցավ այն, ինչ տեղի ունեցավ»,- դժգոհեց ՀԿ ղեկավարը:
Ավելի վաղ NEWS.am-ը հայտնել էր, որ Մանվել Գրիգորյանը ձերբակալվել է իր առանձնատանը անօրինական զենք եւ զինամթերք հայտնաբերելու վերաբերյալ հարուցված քրեական գործի շրջանակներում: Հետագայում ՀՀ ԱԱԾ-ն նոր մանրամասներ էր ներկայացրել. պարզվել էր, որ Գրիգորյանը կասկածվում է նաեւ 2016 թվականին ապրիլյան մարտական գործողությունների օրերին զինծառայողներին դպրոցականների կողմից ուղարկված օգնությունը յուրացնելու համար: ԱԱԾ-ն այս փաստը հաստատող տեսանյութ էր հրապարակել: