Թուրքիայում կայացած ընտրություններում նախագահի թեկնածուներին ԶԼՄ-ներում իրենց քարոզարշավներն իրականացնելու համար հավասար պայմաններ չեն տրամադրվել, միջազգային դիտորդները չեն ստացել անհրաժեշտ ողջ տեղեկատվությունը, փոխանցում է «ՌԻԱ Նովոստի»-ն:
«Ընտրողների մասնակցությունը մենք որպես դրական պահ ենք գնահատում, այդպիսով նրանք քաղաքացիական հասունություն են ցուցաբերել: Սակայն ընտրությունների օրն ընտրական քարոզարշավի միայն մի մասն է, որը սկսվել է այն պահից, երբ հայտարարվել է ընտրությունների մասին: Թեկնածուներին լրատվամիջոցներում իրենց քարոզարշավներն իրականացնելու համար հավասար պայմաններ չեն տրամադրվել… Եղել են դեպքեր, երբ քվեաթերթիկներն առանց կնիքի են հաշվել, ընտրատեղամասերում ոստիկանների մեծ թվաքանակը եւս բացասական կողմ է»,- ասել է ընտրություններին ԵԽԽՎ առաքելության ներկայացուցիչ Օլենա Սոտնիկը:
«Չնայած ընտրությունները լիովին արդար չէին, ընտրողներն իրենց ընտրությունը գիտակցաբար կատարելու հնարավորություն ունեին: Մենք բազմաթիվ հանդիպումներ ենք անցկացրել հասարակական կազմակերպությունների հետ: Մենք սպասում էինք, որ մեզ ավելի շատ կօգնեն եւ տեղեկատվություն կտրամադրեն: Մի քանի տեղամասերի տեղափոխումն եւ միացումը խոչընդոտել են մի շարք ընտրողների քվեարկությանը: Մենք քննադատորեն ենք գնահատում նաեւ այն փաստը, որ ընտրությունների ընթացքում գործել է արտակարգ դրության ռեժիմը»,- ասել է ԵԱՀԿ հատուկ համակարգող Իգնասիո Սանչես Ամորը:
