Ընթացիկ տարվա ապրիլից Ադրբեջանը լրացուցիչ ստորաբաժանումներ է տեղակայում Արցախի հետ շփման գծում: Այս մասին NEWS.am-ի հետ զրույցում ասաց Արցախի նախագահի մամուլի քարտուղար Դավիթ Բաբայանը:
«Ադրբեջանը, սակայն, չպետք է պատրանքներով սնվի: Եվ Ադրբեջանում պետք է իմանան՝ մենք կպաշտպանվենք մինչեւ վերջ, ցանկացած մեթոդներով, մինչեւ արյան վերջին կաթիլը՝ մեր եւ ադրբեջանական: Նրանց հրահրած պատերազմը ճակատագրական կլինի: Մենք պատերազմ չենք ցանկանում: Եվ մենք համոզված ենք, որ նորմալ չէ երեխաների, ծերունիների, կանանց մահը ցանկանալ միայն այն պատճառով, որ նրանք ուրիշ ազգության են պատկանում: Մենք չենք ցանկանում ադրբեջանցիներին սպանել, չենք ցանկանում նրանց պետությունը ոչնչացնել, սակայն մենք մեր երկիրը կպաշտպանենք, եւ կա անցած տարիների փորձը, թե ինչով են ավարտվել Բաքվի պատրանքները»,- շեշտեց Բաբայանը:
Միաժամանակ, նա հիշեցրեց, որ պատերազմում չի կարող հաղթել միայն բանակը՝ ամուր թիկունք է անհրաժեշտ: «Մեր դեպքում դա Հայաստանի, Արցախի եւ Սփյուռքի եռամիասնությունն է: Ադրբեջանը եւ Թուրքիան փորձում են խախտել եռամիասնությունը: Բայց դա անհեռանկարային է: Չնայած ամեն ինչին, ժողովուրդն իմաստուն է: Եվ եթե Ադրբեջանը նոր պատաերազմ հրահրի, դա կլինի ոչ թե կենաց, այլ մահու պատերազմ: Մեզ համար դա մեր քաղաքների ու գյուղերի, մեր հողի պաշտպանությունն է: Ադրբեջանի համար՝ հավակնությունների հարց: Դրանք անհամաչափ հասկացություններ են, եւ այն նոր պարտություն է խոստանում չափն անցած հակառակորդին: Այլ ճանապարհ չկա»,- շեշտեց Դավիթ Բաբայանը: