Հայաստանի Ազգային ժողովում ընթանում է Ընտրական օրենսգրքի փոփոխությունների հարցով ԱԺ 4 ուժերի ներկայացուցիչներից կազմված աշխատանքային խմբի երկրորդ նիստը:
Առաջին նիստում իրենց առաջարկները ներկայացրին ՀՀԿ-ն եւ ՀՅԴ-ն: Մասնավորապես, ՀՀԿ ներկայացուցիչ Դավիթ Հարությունյանն առաջարկում է ՏԻՄ ընտրությունների ժամանակ նախատեսել քվեաթերթիկների լրացուցիչ խմբաքանակներ, որը թույլ կտա խուսափել «կարուսել»-ից: նաեւ առաջարկում է տեխնիկական սարքերով ընտրողների գրանցումը կատարել միայն ID քարտերով, այսինքն բոլորին զանգվածաբար ID քարտեր բաժանել:
ՀՀԿ-ն առաջարկում է նաեւ քվեարկել ոչ թե ձեռքով, այլ հատուկ սարքերի միջոցով՝ «թաչ-սքրինի» մեխանիզմով, ինչը լրացուցիչ ծախսերի հետ է կապված:
ՀՅԴ-ն իր հերթին առաջարկում է ընտրություններն անցկացնել բաց համամասնական ցուցակներով, ձեւավորել ընտրական մասնագիտացված հանձնաժողովների համակարգ, կուսակցություններին կամ կուսակցությունների դաշինքներին տրվող մանդատների առավելագույն 2/3 շեմի նվազեցնել մինչեւ մանդատների ընդհանուր թվի 3/5-ը,. որպեսզի ոչ մի կուսակցություն չունենա 60 տոկոսից ավելի մանդատ:
ՀՅԴ-ն առաջարկում է նաեւ բազմակի քվեարկությունները բացառող համապետական միասնական ցանցի ստեղծել, ինչպես նաեւ քաղաքական նպատակով բարեգործությունը բացառելու համար արգելել, որ եթե կա «Պողոս Պողոսյան» անունով հիմնադրամ, նույն անունով կուսակցություն կամ դաշինք մասնակցի ընտրություններին:
Նշենք, որ ԱԺ-ում գործող այս աշխատանքային խմբում ընդգրկված են խորհրդարանական 4 ուժերը, յուրաքանչյուրը 3 ներկայացուցչով:
Բացի այս աշխատանքային խումբը, իր հերթին ՀՀ վարչապետ Նիկոլ Փաշինյանը որոշում է ստորագրել ՀՀ վարչապետին առընթեր ընտրական օրենսդրության բարեփոխումների հանձնաժողով ստեղծելու մասին, որը գլխավորում է առաջին փոխվարչապետ Արարատ Միրզոյանը: Այս հանձնաժողովն արդեն մի քանի նիստ է անցկացրել: Մասնավորապես, այս հանձնաժողովում որոշվել է, որ ընտրությունները պետք է անցկացվեն 100 տոկոսավոց համամասնական փակ ցուցակներով, բացի այդ, առաջարկվել է անցողիկ շեմը նվազեցնել մեկ տոկոսով: