Վրաստանում Հայաստանի դեսպանին պատանդ վերցնելու կոչի համար քրեական պատասխանատվության է կանչվել Վրաստանի քաղաքացի։ Խոսքը 2016-ին Լեռնային Ղաաբաղում տեղի ունեցած զինված բախումների ժամանակ սոցցանցում հրապարակված կոչի մասին է։ Ըստ գործի նյութերի, անձը, որին մեղադրում են ահաբեկչության հրապարակային կոչի մեջ, Վրաստանի քաղաքացի է ։Չնայած գործի գաղտնիությանը, «ԻնտերպրեսՆյուս»-ին որոշ մանրամասներ են հայտնի դարձել ։
Ըստ աղբյուրի՝ 2016-ի ապրիլյան պատերազմի ժամանակ մեղադրյալը «Ֆեյսբուքում» Վրաստանում ապրող ադրբեջանցիներին կոչ էր արել հավաքվել Հայաստանի դեսպանատան մոտ։ Ըստ գործի նյութերի՝ գրառման մեջ մեղադրյալը նաեւ գրել էր այն մասին, որ պետք է այրել Հայաստանի դրոշը, ներխուժել հայկական դեսպանատան շենք ու պատանդ վերցնել դեսպանին։
Կոչը չէր իրականացվել, սակայն այդ կոչի հեղինակի դեմ քրեական հետապնդում է սկսվել մոտ 2 տարի անց։ Այդ ժամանակահատվածում քննությունը պաշտոնական պատասխանների էր սպասում, այդ թվում «Ֆեյսբուքից», որոնք պետք է հաստատեին, որ գրառման հեղինակն իրոք այն մարդն է, որի դեմ մտադիր էին քրեական հետապնդում սկսել։
Պաշտոնական մեղադրանք առաջադրելուց հետո որպես խափանման միջոց է ընտրվել գրավը։ Հիմա դատարանում ընթանում է գործի քննությունը ։