Եվրոպայի խորհուրդը հորդորել է խորհրդարանում ապահովել կանանց 40 տոկոս մասնակցություն: Այս մասին, այսօր՝ հուլիսի 6-ին, ՀՀ վարչապետին առընթեր ընտրական օրենսդրության բարեփոխումների հանձնաժողովում նշեց Հանձնաժողովի քարտուղար Դանիել Իոաննիսյանը՝ հիշեցնելով, որ թեեւ գործող կարգավորման համաձայն համամասնական ցուցակի ամեն չորրորդը պետք է լինի կին, սակայն տարածքային ընտրակարգի հետեւանքով ներկայումս ԱԺ-ում կանայք 25 տոկոսի փոխարեն 18 տոկոս են կազմում:
Իոաննիսյանը կարծիք հայտնեց, որ խորհրդարանում կանանց մասնակցության քվոտան այնպիսին պետք է լինի, որ հասարակությունը տեսնի՝ կանայք քաղաքականութամբ զբաղվոմ են, եւ դա նորմալ է, լավ է. «Բայց չեմ կարծում, որ պետք է լինի շատ բարձր, ինչը չափազանց արհեստական կդիտվի: Եթե մենք քվոտան շատ բարձր սահմանենք, կա մտավախություն, որ կանանց միջեւ մրցակցությունը ցածր մակարդակի կիջնի կուսակցության ներսում, եւ խորհրդարան անցած կանանց որակը, որպես քաղաքական գործիչների, ցածր կլինի»,-ասաց նա:
«ՊրոՄեդիա-Գենդեր» ՀԿ նախագահ, «Womennet.am» կայքի «Կինը եւ քաղաքականությունը» հավելվածի գլխավոր խմբագիր Թամարա Հովնաթանյանն իր խոսքում նշեց, որ ժամանակին իրենք կողմնակից են եղել ԱԺ-ում կանանց 30 տոկոս ներկայությանը, սակայն հիմա իրավիճակ է փոխվել եւ առաջարկում են այդ հարաբերակցությունը սահմանել 40/60:
«Ընդդեմ կանանց նկատմամբ բռնության կոալիցիայի» համակարգող, իրավապաշտպան Զարուհի Հովհաննիսյանն էլ նկատեց, որ հեղափոխության ընթացքում կանայք մեծ մասնակցություն են ունեցել, դրանով ցույց տալով, որ կարող են քաղաքականության մեջ իրենց տեղն ունենալ. Նա հանձնաժողովին փոխանցեց իրենց առաջարկների փաթեթը, որտեղ առաջարկներից մեկը վերաբերում էր 50/50 համամասնությանը:
