Ռուսաստանի Անվտանգության խորհրդի քարտուղար Նիկոլայ Պատրուշեւը Հայաստանի Անվտանգության խորհրդի քարտուղար Արմեն Գրիգորյանի հետ հանդիպման ժամանակ վերահաստատել է Մոսկվայի դիրքորոշումը ղարաբաղյան հակամարտության խաղաղ եւ փուլային կարգավորման օգտին՝ հաշվի առնելով բոլոր կողմերի շահերը: Այս մասին հայտնում է ՌԴ Անվտանգության խորհրդի մամուլի ծառայությունը, փոխանցում է «ՏԱՍՍ»-ը:
«Վերահաստատվել է Ռուսաստանի դիրքորոշումը, որը կողմ է կայունությանը տարածաշրջանում, Լեռնային Ղարաբաղի խնդրի խաղաղ, փուլային կարգավորման օգտին՝ հաշվի առնելով բոլոր կողմերի շահերը»: Նիկոլայ Պատրուշեւը եւ Արմեն Գրիգորյանը մտքեր են փոխանակել երկու երկրների միջազգային, տարածաշրջանային եւ ազգային անվտանգության ապահովմանն առնչվող հարցերի շուրջ՝ հատուկ ուշադրություն դարձնելով անվտանգության ոլորտում հայ-ռուսական փոխգործակցության հեռանկարներին՝ ինչպես երկկողմ, այնպես էլ բազմակողմ ձեւաչափերով:
«Զրուցակիցները նշել են ռուս-հայկական համագործակցության եւ ռազմավարական գործընկերության բարձր դինամիկան, բարձր եւ ամենաբարձր մակարդակներում երկկողմ երկխոսության, ինչպես նաեւ նախարարությունների եւ գերատեսչությունների միջեւ շփումների վստահելի եւ կառուցողական բնույթը»,- նշվում է հայտարարության մեջ:
Պատրուշեւը եւ Գրիգորյանը համաձայնել են Ռուսաստանի եւ Հայաստանի Անվտանգության խորհուրդների ապարատների գծով համագործակցության՝ 2019-2020 թվականների ծրագիր նախապատրաստել եւ հաստատել այն նոյեմբերին Մոսկվայում նախատեսված ԱՊՀ անդամ պետությունների անվտանգության խորհուրդների քարտուղարների վեցերորդ հանդիպման ժամանակ: