Որքանով է համադրելի ճանապարհային երթևեկության կանոնների խախտման համար նախատեսված տուգանքներն ու մարդկանց աշխատավարձը: Այս մասին, այսօր՝ հուլիսի 11-ին, ԱԺ-ում ՃՈ տուգանքների համաներման վերաբերյալ օրինագծի քննարկման ժամանակ նշել է «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը:
«Ո՞ր մասն էր այդ տուգանքների անհուսալի: Մարդիկ կա՞ն, որ չեն աշխատում, գույք չունեն, չեն կարող վճարել: Չե՞ք կարծում, որ այս ամենն առաջացել է՝ հաշվի առնելով միջին աշխատավարձերի մակարդակը: Տուգանքները աշխատավարձերի համեմատ բարձր են, պետք է արմատապես վերանայել»,- ասաց Միքայել Մելքումյանը:
Ի պատասխան Արդարադատության նախարար Արտակ Զեյնալյանը նշեց, որ այս ոլորտում լրջագույն բարեփոխումներ են պատրաստվում, սկսած համադրելի տուգանքներից մինչեւ ավելի խիստ տուգանքների կիրառում. «Որոշակի սղագրումներ կան, ուսումնասիրում ենք: Տարբեր երկրներում տարբեր մոտեցումներ կան. մի տեղ ցածր է, մի տեղ խիստ ու ծանր են: Ճշգրիտ տվյալներ ներկայացնել հնարավոր չէ, ռեգիստր չի վարվել: Հետագայում ճշգրիտ վիճակագրություն վարելու համար եւս մենք կարիք ունենք զրոյացնելու վիճակը, որ կարողանանք կառավարել: Նաեւ այդ նպատակն է հետապնդում այս օրինագիծը»:
