Բաքուն դիմակայում է բանակցություններին Արցախի մասնակցությանը, քանի որ չի ցանկանում բանակցություններում առաջընթաց տեսնել: Այս մասին այսօր՝ հուլիսի 11-ին լրագրողների հետ զրույցում նշեց ՀՀ արտաքին գործերի նախարարի տեղակալ Շավարշ Քոչարյանը։

«Եթե բանակցային գործընթացում մենք չենք ակնկալում առաջընթաց, ապա վերադառնում ենք Արցախի մասնակցությանը: Խնդիրը հետեւյալն է. ցանկանո՞ւմ է Բաքուն առաջընթաց, թե՞ ոչ»,- շեշտեց նա։

Քոչարյանի համոզմամբ՝ այն հանգամանքը, որ Ադրբեջանը դիմակայում է բանակցություններին Արցախի մասնակցությանը, վկայում է այն մասին, որ նա առաջընթաց չի ցանկանում. «Հայտնի է, որ երբ Բաքուն առաջընթաց է ցանկանում, անմիջապես բանակցում է Ստեփանակերտի հետ։ Դրա վկայությունը 1994 թվականի համաձայնագիրն է»։

Հարցին՝ ԵԱՀԿ Մինսկի խմբի համանախագահներն անելիք ունե՞ն այն խնդրում, որ Բաքուն խոչընդոտում է բանակցություններում առաջընթացին, Քոչարյանը հավաստեց, որ ԵԱՀԿ Մինսկի խմբի համանախագահներն իրենց անելիքն անում են, սակայն նրանք պարտադրելու մանդատ չունեն։

«Նրա մանդատը կողմերի դիրքորոշումները մերձեցնելն է եւ թույլ չտալը, որ ռազմական գործողությունները վերսկսեն։ Իսկ եթե առաջընթաց չկա բանակցություններում, մեղավորը ԵԱՀԿ Մինսկի խմբի համանախագահները չեն, այլ Բաքուն»,- եզրափակեց նա։