Այն, որ ՀՀԿ-ԲՀԿ հակասություն գոյություն ունի, դա ակնհայտ է։ Այս մասին լրագրողների հետ հանդիպման ժամանակ հունվարի 28-ին հայտարարեց Հայ ազգային կոնգրեսի համակարգող Լեւոն Զուրաբյանը՝ մեկնաբանելով ՀՀԿ-ի կողմից ԲՀԿ-ին ներկայացված վերջնագրի մասին լուրերը։ Նա, սակայն, առաջարկեց առկա հակասությունների մասին խոսել այն ժամանակ, երբ դրանք բացահայտ տեսք ստանան։
«Ինքը՝ Սերժ Սարգսյանն էլ այդ մասին ասաց, հայտարելով, թե պահանջ է ներկայացրել ԲՀԿ-ին։ Եթե պահանջը չես կատարում եւ դրան հետեւում են որոշակի պատժամիջոցներ, դա վերջնագիր է։ Եկեք սպասենք, տեսնենք պահանջը կատարվում է թե՝ ոչ, եւ ինչ հետեւանքներ են հաջորդում դրանց, հետո նոր խոսենք դրանց մասին»,-հայտարարեց Զուրաբյանը։ Նա միաժամանակ հավելեց, որ ԲՀԿ-ն եւ մնացած բոլոր քաղաքական ուժերն ունեն երկու ճանապարհ՝ «կա՜մ դառնալ ռեժմի մաս՝ դառնալով տիկնիկային ընդդիմություն, հաճախորդ, կերակրատաշտից օգտվող, կա՜մ էլ միանալ բռնապետության դեմ պայքարին»։
Զուրաբյանը նշեց նաեւ, որ Հայ ազգային կոնգրեսը միայն կողջունի բոլոր այն ուժերին, «որոնք կանցնեն սահմանը»։ «Բոլոր այն ուժերը, որոնք գոռում են ազատ արձակել քաղբանտարկյալներին, դա միայն ողջունելի է։ Իհարկե, լավ կլիներ նաեւ, որ պահանջեին նաեւ մարտի 1-ի հանցագործությունների բացահայտումը։ Սակայն այդ սահմանը դեռ չեն անցնում»,-հայտարարեց ընդդիմադիր գործիչը։ Նա ոչ մի խնդիր չի տեսնում, որ ռեժիմի դեմ պայքարողները միավորվեն այլ դրոշների ներքո, միայն թե պայքարեն։ «Դա նշանակում է, որ, նախ՝ մեր ստարտեգիան աշխատեց, եւ երկրորդ՝ նորանոր մարդիկ ներգրավվեցին այդ պայքարում։ Դրանից ավելի լավ բա՞ն»,-եզրափակեց ՀԱԿ համակարգողը։
Նշենք, որ քաղբանտարկյալների ազատ արձակման հարցը, ըստ մամուլի հրապարակումների, այս օրերին քննարկվում է ԲՀԿ-ում։ Իսկ թե երբ է ԲՀԿ-ն հանդես գալու կոնկրետ պահանջով, դեռեւս հայտնի չէ։