Հուլիսի 23-ին ՀՀ արտակարգ իրավիճակների նախարարությունում կայացել է հերթական ամենշաբաթյա խորհրդակցությունը, որը վարեց նախարար Հրաչյա Ռոստոմյանը:
ԱԻՆ-ից NEWS.am-ին հայտնում են, որ նախարար Ռոստոմյանն անդրադարձել է անցած շաբաթվա վերջին մայրաքաղաքում տեղի ունեցած խոշոր հրդեհներին՝ ՓԾ տնօրենին հանձնարարելով անհրաժեշտության դեպքում սահմանել արձագանքող ուժերի ուժեղացված հերթապահություն, խստորեն հետեւել տեխնիկական միջոցների վերոնորգմանը՝ բացառելով դրանց անսարք վիճակում շահագործումը եւ ուշացումները դեպքի վայր, ինչպես նաեւ առաջարկ ներկայացնել հրշեջ-փրկարարական ջոկատների անձնակազմերի համալրման վերաբերյալ՝ հաշվի առնելով դրանց ծանրաբեռնվածությունը:
ԱԻ փոխնախարարներին Հրաչյա Ռոստոմյանը հանձնարարել է վերահսկել համակարգի ստորաբաժանումների շենք-շինություններում իրականացվող շինարարական աշխատանքների որակներին ու սահմանված ժամկետների պահպանմանը:
Խորհրդակցության ընթացքում անդրադառնալով 2018 թ. երկրորդ կիսամյակում հանրապետությունում սպասվող խոշոր միջոցառումներին, ինչպիսիք են մայրաքաղաքի 2800-ամյակի տոնակատարությունները, Ֆրանկոֆոնիայի գագաթաժողովի եւ Սպիտակի երկրաշարժի 30-ամյակին նվիրված միջոցառումները՝ ԱԻ նախարարն ընդգծել է դրանց պատշաճ կերպով պատրաստվելու եւ անվտանգությունն ապահովելու խնդիրների հարցում հետեւողական լինելու անհրաժեշտությունը: