Կառավարությունը հավանություն տվեց «Սաթենկար» ՍՊԸ-ին 3 տարով արտոնություն տալու մասին հարցին, որը վերաբերում է ապրանքների ներկրման դեպքում ավելացված արժեքի հարկից ազատելուն:
ՀՀ տնտեսական զարգացման եւ ներդրումների նախարար Արծվիկ Մինասյանն ասաց, որ 286.5 միլիոն դրամի չափով ներդրում է կատարվելու, եւ ըստ ներդրումային ծրագրի՝ ստեղծվելու է 24 աշխատատեղ՝ 94.000 դրամով:
«Մենք տրիկոտաժի ոլորտը համարել ենք գերակա, եւ ով դիմում է այս ոլորտում՝ որեւէ խոչընդոտ, որեւէ հավելյալ բեռ չենք դնում, միայն թե իրականացվեն ծրագրերը, որ աշխատատեղեր ստեղծվեն: Այս պահին ստեղծված է 16 աշխատատեղ եւ եթե ԱԱՀ հետաձգումը լինի, մաքսատուրքի մասով էլ արտոնությունը լինի, ծրագրում կավելանան աշխատատեղերը»,- ասաց Մինասյանը:
Վարչապետ Նիկոլ Փաշինյանն ասաց, որ հրավիրում են ներդրումներ կատարել այս ոլորտում:
Փաշինյանը տեղեկացրեց, որ զինվորների ներքնաշորերի հետ կապված չլուծվող խնդիր կա, եւ Պաշտպանության նախարարությունը եւ գլխավոր շտաբը լուրջ զբաղվել են այս խնդրով. «Որոշում է կայացվել, որ խնդրի լուծման գործում ներգրավենք տեքստիլ ոլորտի արտադրողներին: Քանի որ նՆախկին մրցույթների հետ կապված խնդիր կա, պայմանավորվել ենք, որ պետք է հրավիրվեն բոլոր արտադրողները եւ բոլորի ներկայությամբ, տեսախցիկների ներքո, պետք է տեղի ունենան բանակցություններ արտադրողների հետ»,- ընդգծեց վարչապետը:
