Ռոբերտ Քոչարյանն այսօր Հատուկ քննչական ծառայություն էր գնացել՝ Մարտի 1-ի գործով հարցաքննության: Հայաստանի երկրորդ նախագահին հարցաքննել են մի քանի ժամ: Ծառայության ղեկավար Սասուն Խաչատրյանը լրագրողներին ասել է՝ հարցաքննությունը տեսաձայնագրվելու եւ կցվելու է քրեական գործին:
Ավելի ուշ Հատուկ քննչական ծառայությունը տեղեկացրեց, որ երկրորդ նախագահին մեղադրանք է առաջադրվել՝ այլ անձանց հետ նախնական համաձայնությամբ Հայաստանի Հանրապետության սահմանադրական կարգը տապալելու համար: Միաժամանակ, Քոչարյանին կալանավորելու միջնորդություն է ներկայացվել դատարան:
Մարտի 1-ի գործով այսօր հարցաքննվել է նաեւ ՀԱՊԿ գլխավոր քարտուղար Յուրի Խաչատուրովը. 2008 թվականի մարտի 1-ին նա Երեւանի կայազորի պետն էր։ Հավելենք, որ գործով ավելի վաղ մեղադրանք է առաջադրվել պաշտպանության նախկին նախարար Միքայել Հարությունյանին. նա հետախուզվում է:
Կառավարության այսօրվա նիստի մեկնարկին վարչապետը տեղեկացրել է, որ 1 ժամ 15 րոպե ժամանակ ունի: Հիշեցրել է, որ Սանկտ Պետերբուրգ է մեկնելու՝ մասնակցելու վարչապետերի ձեւաչափով ԵՏՄ միջկառավարական խորհրդի նիստին:
Պաշտպանության նախարարն առաջարկել է այս տարվա ամառային զորակոչի ժամկետը երկարաձգել մինչեւ օգոստոսի 11-ը: Դա, սակայն, չի ազդի զորացրման ժամկետների վրա: Նիկոլ Փաշինյանն էլ անդրադարձել է բարձրաստիճան պաշտոնյաների զավակների ժամկետային զինծառայության մեկնելու հարցին: Վստահեցրել է՝ ուսումնասիրություններ են արվում, միաժամանակ փաստել, որ զորակոչի ոլորտում չարաշահումներ դեռ կան: Վարչապետը կրկին հայտարարել է. կոռուպցիայի հետ կոմպրոմիս չի լինելու:
Մարզպետարաններին շուրջ 279 մլն դրամ կտրամադրվի՝ համայնքներին սուբվենցիաներ տրամադրելու նպատակով: Այստեղ Նիկոլ Փաշինյանն արձանագրել է. պետության միջոցները, այո, սահմանափակ են, բայց եղածն էլ ճիշտ չի օգտագործվում:
Նիստից հետո լրագրողների հետ ճեպազրույց է ունեցել Դավիթ Անանյանը: Պետեկամուտների կոմիտեի նախագահն այսօր փոքր-ինչ լարված էր ու նյարդային: Տեսախցիկների ուղղությամբ նայելու խնդրանքը զայրացրել է նրան: Լրագրողները տարակուսել են. գուցե վերեւո՞ւմ են բարկացրել: Դավիթ Անանյանն արդեն ժպիտով խոստացել է այսուհետ կառավարել իր հույզերը:
Միհրան Պողոսյանին պատկանող ընկերությունների գործով, որի անունը կապվում է օֆշորների հետ, քննչական գործողությունները վերսկսվել են: ՊԵԿ ղեկավարը հաստատել է լուրը, սակայն այլ տեղեկություն հրաժարվել է հայտնել: Հարցին՝ բավարարում է իրեն, որ մարդիկ պատճառված վնասը վերադարձնում են եւ պատասխանատվության չեն ենթարկվում, Դավիթ Անանյանը պատասխանել է. իրեն՝ որպես տնտեսագետի բավարարում է, ու պարզաբանել:
Ինչ վերաբերում է օրենսդրական դաշտից եւ տուգանքներից գործարարների բողոքներին. ՊԵԿ նախագահը վստահեցնում է՝ փոքր եւ միջին բիզնեսի մոտ կոշտ վարչարարություն չի իրականացվում: Իսկ դժգոհությունների հետեւանքով հնարավոր ակցիաներից ու բունտերից Դավիթ Անանյանը չի վախենում:
Սանկտ Պետերբուրգ մեկնած Նիկոլ Փաշինյանն արդեն հասցրել է հանդիպել հայ գործարարների հետ: Վարչապետը նրանց հրավիրել է Հայաստան՝ ներդրումներ անելու: Վստահեցրել է, որ բիզնեսի համար նախկինում առկա խոչընդոտներն այլեւս չկան:
Փաշինյանը շնորհակալություն է հայտնել տարբեր տարիների եւ տարբեր միջոցներով Հայաստանին օգնելու համար: Բայց հիմա, նրա խոսքով, պետք է փոխել համագործակցության տրամաբանությունը. պետք է պայմաններ ստեղծել, որ գործարարները գան Հայաստան, ներդրումներ անեն եւ փող աշխատեն: Անդրադառնալով լուրերին, թե բիզնեսը դադար է վերցրել եւ սպասում է ընտրություններին՝ հասկանալու համար, թե ինչ է տեղի ունենալու երկրում, Փաշինյանը վստահեցրել է, որ Հայաստանում հակահեղափոխություն տեղի չի ունենալու:
Հայ-վրացական սահմանի Բագրատաշենի մաքսակետում միջադեպ է տեղի ունեցել: Ըստ տեղեկությունների՝ մաքսային ծառայության աշխատակիցները լվացքի մեքենայի համար քաղաքացուց 100 դոլար մաքսավճար են պահանջել, արդյունքում տղամարդը հենց տեղում կոտրել է լվացքի մեքենան: Միջադեպը տեսագրվել է ու տարածվել սոցցանցերում:
Պետեկամուտների կոմիտեն պարզաբանում է տարածել՝ հրապարակելով քաղաքացու անունը. նա Երեւանի բնակիչ Սեյրան Դեմիրճյանն է: ՊԵԿ-ի պնդմամբ՝ նա սահմանահատումների եւ ներմուծումների պատկառելի փորձ ունի: Կոմիտեի ղեկավար Դավիթ Անանյանն ասում է՝ որեւէ 100 դոլարի մասին խոսք չի եղել, իսկ մաքսային ծառայողներն օրենքով են գործել:
Քաղաքացիների շրջանում դժգոհություն կա նաեւ՝ կապված ձմերուկի ներկրման օրենսդրական կարգավորման շուրջ: Դավիթ Անանյանը չի հերքում՝ ԵՏՄ իրավակարգավորումներով 5 կգ-ի սահմանափակում կա, եւ մաքսավորները չեն կարող շրջանցել դա՝ անկախ նրանից, քաղաքացիներին դա դո՞ւր է գալիս, թե՞ ոչ:
Հուլիսի 26-ին դոլարն ու եվրոն շարունակել են թանկանալ: Դոլարի փոխարժեքը կազմել է 481 դրամ, եվրոյինը՝ 563, ռուբլունը՝ 7 դրամ 64 լումա, ֆունտինը՝ 634 դրամ:
Հուլիսի 27-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Ուլտրամանուշակագույն ճառագայթման ինդեքսը՝ 7: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +23+25, ցերեկը՝ +39+41 աստիճան տաքություն: