Սոցիալ Դեմոկրատ Հնչակյան կուսակցությունը կմասնակցի Երևանի ավագանու ընտրություններին:
Այս առնչությամբ կուսակցության տարածած հաղորդագրության մեջ ասվում է.
«Սոցիալ Դեմոկրատ Հնչակյան կուսակցության Հայաստանի վարչությունն արձանագրելով, որ քաղաքական իրավիճակի փոփոխության արդյունքում վերականգնվել է Հայաստանի քաղաքացու ընտրելու և ընտրվելու ազատությունը, ստեղծվել է գաղափարների մրցակցության հնարավորություն, որոշում է կայացրել մասնակցել առաջիկայում կայանալիք Երևանի ավագանու ընտրություններին:
Կուսակցության վարչությունը բանակցություններ է սկսում հնարավոր դաշնակից քաղաքական ուժերի հետ, միաժամանակ ունենալով ընտրություններին միայնակ մասնակցելու և սեփական քաղաքապետի թեկնածու առաջադրելու տարբերակ»:
Ավելի վաղ NEWS.am-ը հայտնել էր, որ Երեւանի ավագանու արտահերթ ընտրություններին «Քաղաքացիական պայմանագիր» կուսակցության ցուցակը կգլխավորի Հայկ Մարությանը (Կարգին Հայկո), ԲՀԿ-ի ցուցակը կգլխավորի Նաիրա Զոհրաբյանը, «Երկիր ծիրանի» կուսակցության ցուցակը՝ Զարուհի Փոստանջյանը, ՀՀՇ-ի ցուցակը՝ Արարատ Զուրաբյանը: Ամենայն հավանականությամբ, «Լուսավոր Հայաստանու» եւ «Հանրապետություն» կուսակցությունները ընտրություններին կմասնակցեն միասնական ցուցակով, որը գլխավորի Արտակ Զեյնալյանը:
