Ավելի քան 10 հազար մարդ, այդ թվում՝ զբոսաշրջիկներ տարհանվել են Ինդոնեզիայի Լոմբոկ կղզուց՝ այստեղ տեղի ունեցած երկրաշարժից հետո, փոխանցում է «ՌԻԱ Նովոստի»–ն։
«Համատեղ որոնողափրկարարական թիմի անդամները դեռեւս պետք է հասնեն Լոմբոկ կղզու բոլոր շրջաններ, հատկապես այն շրջաններ, որոնք բոլորից շատ են տուժել»,–հայտնել է Տարերային աղետների հետեւանքների վերացման ազգային գործակալության ներկայացուցիչ Սուտոպո Պուրվո Նուգրոհոն։ Նրա խոսքով՝ ստորգետնյա ցնցումների հետեւանքով ավերվել են մի քանի հյուրանոցներ ու 3 կամուրջներ։
Ականատեսների տվյալներով՝ Լոմբոկ կղզում երկրաշարժն ուժեղ է եղել, ցնցումները զգացվել են նաեւ Բալիում։ Վերջին տվյալներով՝ աղետի հետեւանքով զոհվել է 91 մարդ, ավելի քան 200 հոգի էլ լուրջ վնասվածքներ են ստացել։
Ավելի վաղ հայտնել էինք, որ Ինդոնեզիայի իշխանությունները Գիլի արշիպելագի ոչ մեծ կղզիներից տարհանել են 1200 զբոսաշրջիկներ։