News
Լրահոս
News
Կիրակի
Սեպտեմբեր 23
Տեսնել լրահոսը


Տապալված մամուլի ասուլիսից հետո Ռոբերտ Քոչարյանն առաջին հարցազրույցն է տվել: «Երկիր Մեդիա»-ին տված հարցազրույցում Հայաստանի երկրորդ նախագահը հայտարարել է, որ քաղաքականություն է վերադարձել: Ռոբերտ Քոչարյանը նաեւ խոսել է Մարտի 1-ի քրեական գործի, այն իրադարձությունների մասին, որոնք հանգեցրին Մարտի 1-ի ողբերգությանը, անդրադարձել է նաեւ նոր կառավարությանը՝ մտահոգություն հայտնելով, մասնավորապես, վարչապետի որոշ հայտարարությունների առնչությամբ:

Նա խոսել է նաեւ Ռուսաստանի հետ հարաբերությունների եւ այժմյան աշխարհաքաղաքական իրավիճակում Հայաստանի իրադրության եւ հավանական վտանգների մասին:  Ինչ վերաբերում է իրեն առաջադրված մեղադրանքին. Ռոբերտ Քոչարյանն ասել է՝ մինչեւ հիմա չի հասկանում, թե ինչպես է տապալել երկրում սահմանադրական կարգը: Նա նաեւ չի բացառել, որ իրեն նորից կկալանավորեն:

Ի դեպ՝ նման հնարավորության մասին. նախկին նախագահի պաշպաններից Հայկ Ալումյանն արդեն հայտարարել է, որ Քոչարյանին կրկին կալանավորելու դեպքում իրենք Մարդու իրավունքների եվրոպական դատարան կդիմեն: Եվ մինչ գլխավոր դատախազությունը սպասում է Վերաքննիչ դատարանի որոշմանը՝ Վճռաբեկ դատարան դիմելու համար, Ռոբերտ Քոչարյանի շահերի պաշտպանները նույնպես վճռաբեկ բողոք են պատրաստում: Հայկ Ալումյանն ասել է՝ անձեռնմխելիությունից բացի՝ պաշտպանական կողմը երկրորդ նախագահի խափանման միջոցը փոխելու եւս երկու հիմք է ներկայացրել, ինչին Վերաքննիչը չի անդրադարձել: Այդ հիմքերն էլ բողոքարկելու են արդեն Վճռաբեկ դատարանում:

Կառավարության հերթական նիստը Նիկոլ Փաշինյանը սկսել է՝ ամփոփելով պաշտոնավարման 100 օրը: Ասել է՝ այս ընթացքում նոր կառավարությունը լուծել է հիմնական խնդիրը. ապահովել է հետհեղափոխական շրջանում երկրի բնականոն գործունեությունը եւ տնտեսության բնականոն, շարունակական զարգացումը:

Գործադիրի նիստում նաեւ կրճատվել է Երեւանի ավագանու լիազորությունների ժամկետը: Որոշման հրապարակումից հետո արդեն ԿԸՀ-ն նիստ կանցկացնի եւ 30-40 օրվա ընթացքում կհրապարակի ավագանու արտահերթ ընտրությունների օրը: Վարչապետը նաեւ ընդգծել է. այս ընտրություններում ընտրակաշառքի որեւէ դեպք չպետք է գրանցվի, իսկ ընտրակաշառքի փորձ անող որեւէ անձ չպետք է մնա առանց պատասխանատվության:

Ոստիկանապետ Վալերի Օսիպյանն էլ աննախադեպ լավ ընտրություններ է խոստացել: Լրագրողների հետ զրույցում նա ասել է` ոստիկանությունը կշարունակի բոլոր ջանքերը՝ մաքսիմալ թափանցիկ ընտրություններ ապահովելու եւ կեղծիքները բացառելու համար:

Իսկ ԱԱԾ տնօրենը լրագրողների հետ ճեպազրույցում ամփոփել է իր ղեկավարած կառույցի 100 օրը: Իսկ ամենախոշոր բացահայտումները, Վանեցյանի հավաստմամբ, դեռ առջեւում են:

ՀՔԾ պետն անդրադարձել է ՀՀ երկրորդ նախագահի ազատ արձակմանը. Սասուն Խաչատրյանը հույս է հայտնել, որ գլխավոր դատախազությունը վճռաբեկ բողոք կներկայացնի եւ Ռոբերտ Քոչարյանը նորից անազատության մեջ կհայտնվի: ՀՔԾ պետը, միաժամանակ, չի կարծում, որ Ռոբերտ Քոչարյանը կլքի երկիրը:

Ինչ վերաբերում է Սերժ Սարգսյանին. Սասուն Խաչատրյանի խոսքով՝ Մարտի 1-ի գործով նա նույնպես հարցաքննվելու է:

Պետեկամուտների կոմիտեն «Հարավկովկասյան երկաթուղի» ընկերությունում ստուգումներ է իրականացրել: Հաղորդվում է նաեւ 9.7 մլն դրամի չափով ԱԱՀ չվճարելու պատճառով քրեական գործ հարուցելու մասին:

Ստուգումները կատարվել են օգոստոսի 14-ի լույս 15-ի գիշերը, իսկ լուրը լրատվամիջոցներում տարածվեց միայն երեկ երեկոյան. ՊԵԿ աշխատակիցներն ընկերություն են մտել դիմակավորված անձանց ուղեկցությամբ, խուզարկություն են կատարել, փաստաթղթեր առգրավել, ստուգել են նույնիսկ աշխատակիցների անձնական իրերը: «Հարավկովկասյան երկաթուղի» ընկերությունում հաստատել են տեղեկությունը եւ տարակուսանք հայտնել. իրենք միշտ բաց եւ թափանցիկ են աշխատել, համագործակցել են հարկային մարմինների հետ:

ՊԵԿ նախագահը լրագրողներին ասել է՝ «Հարավկովկասյան երկաթուղի»-ում իրականացվող գործողությունները որոշակի գաղտնիության շրջանակում են: Նա խոսել է նաեւ «դիմակավորված անձանց» մասին: Դավիթ Անանյանը նաեւ պարզաբանել է, թե ինչու է խուզարկությունն իրականացվել գիշերը:

Հավելենք, որ «Հարավկովկասյան երկաթուղի» ընկերությունը պատրաստվում է կատարվածի կապակցությամբ գրավոր բողոք ներկայացնել Հայաստանի իշխանություններին:

Ոստիկանությունն ակտիվորեն նախապատրաստվում է վաղը Հանրապետության հրապարակում Նիկոլ Փաշինյանի հրավիրած հանրահավաքին: Օգոստոսի 17-ին ժամը 15:00-ից կարգելվի Հանրապետության հրապարակ մուտքը Ամիրյան, Աբովյան, Նալբանդյան, Վազգեն Սարգսյան փողոցներից եւ Տիգրան Մեծ պողոտայից: Փակ կլինի նաեւ Իտալիայի փողոցը՝ Գրիգոր Լուսավորիչ խաչմերուկից: Առավոտյան 7:00-ից մինչեւ երեկոյան 22:00-ն էլ կարգելվի տրանսպորտային միջոցների կայանումը Հանրապետության հրապարակի տարածքում եւ Ամիրյան, Նալբանդյան, Աբովյան, Վազգեն Սարգսյան, Զաքյան փողոցներում եւ Տիգրան Մեծ պողոտայում՝ Մելիք-Ադամյան խաչմերուկից սկսած: 

Սահմանափակումներ կլինեն նաեւ լրատվամիջոցների համար. անվտանգության նկատառումներով ոստիկանությունը լրատվամիջոցներին արգելել է դրոնների միջոցով օդից տեսանկարահանել հանրահավաքը:

Երեկ ուշ երեկոյան ռումբի մասին եւս մեկ ահազանգ է ստացվել: Մի քաղաքացի «911» ծառայություն է զանգել եւ սպառնացել, որ պատրաստվում է ռումբ տեղադրել Երեւանի «Սիլաչի» հյուրանոցում: Փրկարարներն արագորեն տարհանել են հյուրանոցում գտնվող մարդկանց՝ 120 հոգու: Որոնողական աշխատանքների արդյունքում, սակայն, վտանգավոր ոչինչ չի հայտնաբերվել:

Օգոստոսի 15-ին ռումբի մասին եւս մեկ կեղծ ահազանգ էր ստացվել. քաղաքացին հայտնել էր, որ պատրաստվում է պայթեցնել առողջապահության նախարարության շենքը: Պարզվել է, որ ահազանգը կեղծ է, իսկ դրա հեղինակն առողջական խնդիրներ ունեցող քաղաքացի է:

Օգոստոսի 16-ին դոլարն ու եվրոն նորից սկսել են արժեւորվել: Դոլարի փոխարժեքը կազմել է 483 դրամ, եվրոյինը՝ 549, ռուբլունը՝ 7 դրամ 23 լումա, ֆունտինը՝ 613 դրամ:

Օգոստոսի 17-ին հանրապետությունում սպասվում է առանց տեղումների եղանակ: Օդի ջերմաստիճանը 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +35+37 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 21.09.2018
Հայ-ադրբեջանական սահմանին տիրող իրադրությանն այսօր անդրադարձել է նաեւ ՀԱՊԿ գլխավոր քարտուղարը...
Օրվա գլխավոր լուրերը՝ «մեկ տողով». 20.09.2018
Կառավարության շենքի առջեւ այսօր լարված իրադրություն էր. առավոտից բողոքի ակցիա անցկացնող արծվաշենցիները փորձել են...
Օրվա գլխավոր լուրերը՝ «մեկ տողով». 19.09.2018
Հակառակորդի կրակոցից Հայաստանի զինված ուժերի զինծառայող է զոհվել...
Օրվա գլխավոր լուրերը՝ «մեկ տողով». 18.09.2018
Նիկոլ Փաշինյանն այսօր Արցախում է եղել. Բակո Սահակյանի եւ բարձրաստիճան զինվորականների հետ առաջնագիծ է այցելել, հետո աշխատանքային քննարկում անցկացրել...
Օրվա գլխավոր լուրերը՝ «մեկ տողով». 17.09.2018
Իրավապահները Yerevan.Today լրատվական կայքի խմբագրությունում վաղ առավոտից խուզարկություն են կատարել. գաղտնալսման սարքեր են փնտրել, ստուգել են համակարգիչները...
Օրվա գլխավոր լուրերը՝ «մեկ տողով». 14.09.2018
«Ռազմավարական նախաձեռնությունների կենտրոն» հիմնադրամը կլուծարվի. այս գործընթացի համար կառավարության պահուստային ֆոնդից վարչապետի աշխատակազմին 33.292 մլն դրամ կհատկացվի...
Partner news