Իրանի հոգեւոր առաջնորդ Այաթոլլա Համենեին արաբական աշխարհում տեղի ունեցած իրադարձությունները «իսլամական արթնացում է» որակել։
«Հյուսիսային Աֆրիկայում, այդ թվում՝ Եգիպտոսում եւ Թունիսում ներկայումս տեղի ունեցող իրադարձությունները Իրանի ժողովրդի համար հատուկ նշանակություն ունեն»,- ասել է նա իրանական հեռուստատեսության եթերում։
Այաթոլլան Եգիպտոսի նախագահ Հոսնի Մուբարաքին «սիոնիստական վարչակարգի լաքեյ» է անվանել՝ նշելով նաեւ, որ Թունիսի պաշտոնանկ արված նախագահ Զին ալ-Աբիդին բեն Ալին կախում ուներ ԱՄՆ-ից եւ ԿՀՎ-ից։
Նշենք, որ փետրվարի 4-ին Եգիպտոսում կկայանա երկիրը 30 տարի անընդմեջ ղեկավարող 82-ամյա նախագահ Հոսնի Մուբարաքի պաշտոնանկության եւ բարեփոխումների իրականացման պահանջներով հերթական ցույցը։
Եգիպտոսի ընդդիմությունն իր կողմակիցներին կոչ է անում փետրվարի 4-ը դարձնել «Մուբարաքի վերջին օրը», իսկ Եգիպտոսի վարչապետ Ահմեդ Շաֆիկը հրահանգել է չխանգարել խաղաղ երթերին։ Ակցիաների կազմակերպիչները մտադիր են Եգիպտոսի մայրաքաղաքում հավաքել ոչ պակաս, քան մեկ մլն ցուցարարի։
