Պայթուցիկ սարքը, որը գործարկվել էր Դոնեցկի «Սեպար» սրճարանում, ինչի հետեւանքով զոհվել էր ինքնահռչակ Դոնեցկի Ժողովրդական Հանրապետության ղեկավար Ալեքսանդր Զախարչենկոն, նախնական տեղեկություններով՝ տեղադրված է եղել հաստատության ջահի կամ տորշերի մեջ: Այս մասին հայտնել է «Կոմերսանտը»՝ վկայակոչելով չներկայացած աղբյուրներին:
Ինչպես նշել են պարբերականի զրուցակիցները, այն գործարկելու համար բավական էր զանգահարել հեռախոսով: Ինչպես պարզաբանել են ուժային կառույցներում պարբերականի աղբյուրները, ռումբն այս կերպ տեղադրելը գործնականում անհնար էր առանց «յուրայինների» օգնության: Սրճարանը, ինչպես նշում է «Կոմերսանտը», պատկանում էր ԴԺՀ ղեկավարի թիկնազորի պետին, որտեղ հաճախ էին լինում բարձրաստիճան հյուրեր, հետեւաբար «Սեպարը» մեծ ուշադրությամ էր պահպանվում:
Սրա հետ կապված, պարբերականի աղբյուրների տեղեկություններով, Դոնեցկի ուժայինները հանցագործության մասնակիցներին որոնում են Զախարչենկոյի մերձավոր շրջապատում: Ընդ որում՝ մարդը, ով գործարկել է պայթուցիկ սարքը, պարբերականի զրուցակիցների ենթադրությամբ, պայթյունի պահին եղել է սրճարանի մոտ եւ տեսել է, երբ Զախարչենկոն տեղ է հասել: Զանգը, որը գործարկել է պայթուցիկ սարքը, Դոնեցկի իրավապահ մարմինների աշխատակիցների վարկածով, նա կատարել է ԴԺՀ ղեկավարի հաստատություն մտնելուն պես: