Աֆղանստանի Նանգարհար նահանգում ցուցարարների բազմության մեջ տեղի ունեցած պայթյունի հետեւանքով առնվազն 50 մարդ է զոհվել: Այս մասին հայտնում է TOLOnews հեռուստաալիքը Twitter-ում՝ վկայակոչելով նահանգային խորհրդի ղեկավարի տեղակալին:
Ընդ որում՝ Հանրային առողջապահության վարչությունից հայտարարել են, որ պայթյունի հետեւանքով զոհվել է գրեթե 30 մարդ:
Ավելի վաղ 1 TV-ն հայտնել էր 25 զոհի եւ 65 տուժածի մասին:
Նահանգապետի ներկայացուցիչը հայտարարել է, որ երեքշաբթի մահապարտ-ահաբեկիչը ինքնապայթեցում է կատարել Նանգահար նահանգի Մոհմանդ Դարա շրջանում հավաքված ցուցարարների բազմության մեջ: Ըստ նրա տեղեկությունների՝ ցուցարարները պահանջում էին հեռացնել Աչիչ շրջանի ոստիկանական ուժերի հրամանատարին:
Երեքշաբթի ավելի վաղ հաղորդվել էր պայթյունների շարքի մասին, որոնք որոտացել էին Նանգարհար նահանգի երեք ուսումնական հաստատությունների մոտ: Ինչպես տեղեկացրել էր Agence France-Presse-ը, նահանգի վարչական կենտրոն Ջելալաբադ քաղաքում դպրոցի մոտ իրագործված ահաբեկչության հետեւանքով զոհվել էր մեկ տղա, եւս 4 մարդ տուժել էր:
Աֆղանստանի տարածքում գործող ոչ մի ահաբեկչական խմբավորում դեռեւս չի ստանձնել տեղի ունեցածի պատասխանատվությունը:
