Երեւանի ավագանու ընտրությունների նախընտրական քարոզարշավը նման է խորհրդարանականին: Սեպտեմբերի 18-ին լրագրողների հետ հանդիպման ժամանակ այսպիսի կարծիք հայտնեց «Երեւանցիներ» դաշինքից քաղաքապետի թեկնածու Արարատ Զուրաբյանը:
Նրա խոսքով՝ քաղաքապետի թեկնածուներից շատերի համար Երեւանի խնդիրները երկրորդական են դարձել, իսկ քարոզարշավն ընթանում է բավականին լարված քաղաքական իրադրության պայմաններում: «Հույս ունեմ, որ նրանք այս վիճակից դուրս կգան, «Երեւան կվերադառնան» եւ կորոշեն, թե մայրաքաղաքի համար ինչ է պետք անել: Քաղաքապետի թեկնածուների միջեւ բանավեճերի բացակայությունը քաղաքացիներին խանգարում է կողմնորոշվել»,- հավելեց Զուրաբյանը:
Ի պատասխան հարցին՝ ո՞ր քաղաքական ուժը ստեղծեց այսքան լարված իրավիճակ, նա պատասխանեց. «Այդ հարցը երկրորդական եմ համարում: Գլխավոր խնդիրն այն է, որ այդ լարվածությունը երեւանցիներին թույլ չի տալիս որոշել, թե քաղաքապետի թեկնածուներից ով է այդ պաշտոնին արժանի, եւ ով է ունակ լուծել մայրաքաղաքի խնդիրները»:
Նրա գնահատմամբ՝ Երեւանը, լինելով ինքնակառավարման առանձին մարմին, զրկվել է իր ինքնուրույնությունից եւ դարձել կառավարության ու իշխանությունների կցորդը: «Այդպես չպետք է լինի. պետական կառավարման եւ տեղական ինքնակառավարման մարմինների միջեւ պետք է հստակ տարաբաժանում լինի: Թեկնածուները պետք է գիտակցեն, որ հավակնում են տեղական ինքնակառավարման ինքնուրույն մարմնի ղեկավարի պաշտոնին»,- պարզաբանեց «Երեւանցիներ» դաշինքի ղեկավարը: