Վարչապետ Նիկոլ Փաշինյանի բոլոր հանրահավաքները կիսով չափ նվիրված են ինձ: Այս մասին «Կոմերսանտին» տված հարցազրույցում հայտարարել է Հայաստանի երկրորդ նախագահ Ռոբերտ Քոչարյանը՝ մեկնաբանելով Փաշինյանի այն հայտարարությունը, թե ինքն ու նախկին նախագահ Սերժ Սարգսյանը քաղաքական դիակներ են:
«Ինչու՞ է նա, պարոն Փաշինյանն, այդքան անհանգստացած: Նրա բոլոր հանրահավաքները կիսով չափ նվիրված են ինձ: Որտեղի՞ց այդ անհանգստությունը, եթե չկա քաղաքական գործոն ի դեմս Քոչարյանի: Ի՞նչ է կատարվում», -ասել է Քոչարյանը: Նրա խոսքով, յուրաքանչյուր ողջամիտ մարդ հասկանում է՝ որն է պատասխանը:
«Որքան ես հասկանում եմ, նրան մտահոգում են իմ նախագահության ժամանակ ձեռք բերված արդյունքները: Եվ հասարակության զգալի մասը հասկանում է, որ ես կարող եմ այդ նորից անել: Ամենակարեւորն այն չէ, թե ինչ եղել է անցյալում, այլ այն ինչ դու կարող ես անել ապագայում: Ի՞նչ ենք այսօր մենք ստացել: Հասարակության բաժանում՝ սեւերի եւ սպիտակների: Վախեցրեցին ոչ միայն սեփական, այլեւ արտասահմանյան ներդրողներին: Հիմնական սննդամթերքների գների կտրուկ աճ, հստակ տնտեսական քաղաքականության լիակատար բացակայություն: Ոչ ոք չգիտի՝ ինչ կա կառավարության այդ նոր անդամների մտքում: Դա նշանակում է անորոշություն, իսկ անորոշությունից փողերը հեռանում են: Սա իմ կառավարման շրջանի լիակատար հակապատկերն է: Եվ լիկատար հակադրություն նրան, թե ինչպես են մարդիկ ինձ պատկերացնում նախագահի դերում. որոշակիություն, կանխատեսելիություն, կարգ, տնտեսական աճ»,-հայտարարել է նա:
