Երեւանի ավագանու ընտրությունների արդյունքների վերաբերյալ չկա ոչ մի կուլիսային պայմանավորվածություն, ոչ մի կուլիսային դավադրություն։ Այս մասին այսօր՝ սեպտեմբերի 19-ին Մալաթիա-Սեբաստիա համայնքում «Իմ քայլը» դաշինքի նախընտրական հանդիպման ժամանակ հայտարարեց ՀՀ վարչապետ Նիկոլ Փաշինյանը։
«Սա Հայաստանի Հանրապետության պատմության, թերեւս, առաջին ընտրությունն է, երբ գործող կառավարությունն այլ ուժերի հետ չի բանակցում, թե ոնց կիսենք քաղաքական դաշտը: Կառավարությունը կամ իշխող քաղաքական ուժը մյուս ուժերի պես պայքարում է յուրաքանչյուրիդ ձայնի համար։ Եվ սա է այս քարոզարշավի առանձնահատկությունը: Բացառիկ երեւույթ է, որ վարչական ռեսուրսը, ընտրական «տասովչիկը» դուրս է ընտրական գործընթացից»,- ասաց Նիկոլ Փաշինյանը։
Վարչապետը նշեց, որ առաջին անգամ է, որ ընտրություններին մասնակցող ոչ մի քաղաքական ուժ «թատրոն չի խաղում»։ Նա վստահեցրեց, որ ընտրությունների արդյունքները որոշվելու են սեպտեմբերի 23-ին, ոչ թե կուլիսներում, ինչպես նախկինում է եղել. «Բոլորը գիտեն, որ ինչ-որ տեղ ընտրությունների արդյունքը գրած չի, չկա, որ երկրի ղեկավարն ասի՝ դու կլինես ընդդիմություն, կասես սա, ես կասեմ դա ու էդպես։ Տարիներ շարունակ այդպես է եղել»:
Փաշինյանի խոսքով՝ ավագանու այս ընտրությունների քարոզարշավի ժամանակ բոլոր ուժերի հնարավորությունները հավասար են, իսկ քարոզարշավն էլ ազատ է, որեւէ սահմանափակում չկա. «Իհարկե, շատ դեպքերում լինում են հայհոյախոսություններ, բայց, օրինակ, իմ ուղիղ եթերների տակ էլ նայեք՝ կան հայհոյախոսություններ, բայց մի տարբերությամբ... լա՛վ, չասեմ, անհամեստություն կթվա... պետք է իրար քննադատություններին ավելի ուշադիր լինենք: Կառավարությանը քննադատելիս պետք չէ բերանները փակել, որովհետեւ խոսքի ազատությունը շատ կարեւոր արժեք է մեզ համար։ Խոսքի ազատությունից խոսում են մարդիկ, որոնք 1 ամսում 3 հեռուստաընկերություն են գնել եւ 20 լրատվական կայք, որը հակաքարոզչությամբ է զբաղված»: