Լեհաստանն այս տարվա օգոստոսի 26-ին ավարտել է ԵՄ-ի եւ Հայաստանի միջեւ համապարփակ եւ ընդլայնված համաձայնագրի վավերացման գործընթացը։ Այդ մասին լեհական Կատովիցա քաղաքում կլիմայի փոփոխման մասին ՄԱԿ 24-րդ համաժողովին նվիրված ճեպազրույցում ասել է Հայաստանում Լեհաստանի դեսպան Պավել Չեպլակը։
«Հավաստիացնում եմ՝ Լեհաստանը կասկած չունի, որ նոր վարչապետը մտադիր է զարգացնել ԵՄ-ի հետ հարաբերությունները»,- նշել է դեսպանը։
Պատասխանելով NEWS.am-ի հարցին, թե ինչ հաջողությունների են հասել կողմերն անցյալ տարի Հայաստան Լեհաստանի ԱԳՆ ղեկավար Վիտոլդ Վաշիկովսկու այցից հետո, Չեպլակը նշեց նախեւառաջ փոխադարձ այցերը՝ երկու երկրների ԱԳՆ-ների եւ խորհրդարանների մակարդակով։
«Անցյալ տարվա աշնանից գրանցվել է Հայաստանի եւ Լեհաստանի երկկողմ համագործակցության լավ ժամանակաշրջան»,- հայտարարեց նա՝ հավելելով , որ նոյեմբերին իրենք սպասում են ԱԳ փոխնախարար Կարեն Նազարյանի այցին։
Ինչպես նաեւ սպասվում է, որ Հայաստանի պետական պատվիրակությունը կմասնակցի Կատովիցայում դեկտեմբերին կայանալիք համաժողովին։