Երեւանի ավագանու ընտրություններին ընտրողների մասնակցության թիվը խոսում է բարձր ակտիվության մասին: Այս մասին, այսօր՝ սեպտեմբերի 24-ին, լրագրողների հետ հանդիպման ժամանակ նշել է ԿԸՀ նախագահ Տիգրան Մուկուչյանը:
Նա նկատեց, որ եթե ընտրությունների օրը առավոտյան մի փոքր քիչ էին այցելում ընտրական տեղամասեր, կեսօրից բավականին բարձրացավ այցելությունը:
«Բավականին բարձր էր մասնակցությունը: Ինչ վերաբերում է հասարակական տրամադրություններին, ապա դրանք բացառապես քաղաքական գնահատականներ են, որը ԿԸՀ-ի տիրույթից դուրս են»,-ասաց նա:
Նշենք, որ Երեւանի ավագանու ընտրություններին մասնակցել է ընտրողների 43,65 տոկոսը: Մեկ տարի առաջ Երեւանի ավագանու ընտրություններին մասնակցությունը եղել է 40,99 տոկոս: Փաստորեն բնակչության շուրջ 55 տոկոսը չի մասնակցել ընտրություններին:
Ավելի վաղ NEWS.am-ը հայտնել էր, որ սեպտեմբերի 23-ին կայացած Երեւանի ավագանու ընտրություններում նախնական տվյալներով «Իմ քայլը» դաշինքը ստացել է 81,06 տոկոս, ԲՀԿ-ն՝ 6,95 տոկոս, «Լույս» դաշինքը՝ 4,99 տոկոս:
