Հայաստանում, ըստ էության, պահպանվել է կառավարման հին մոդելը: Այս մասին սեպտեմբերի 28-ին լրագրողների հետ հանդիպման ժամանակ հայտարարեց Հայաստանի առաջին օմբուդսմեն, իրավապաշտպան Լարիսա Ալավերդյանը:
Սա, ըստ նրա, պայմանավորված է նրանով, որ երկրում իրական հակակշիռ չի ստեղծվել: «Իսկ եթե հակակշիռների համակարգ չկա, ապա միշտ էլ իշխանության մենաշնորհ կլինի», - դժգոհեց Ալավերդյանը` հավելելով, որ վերջնական հաղթանակը կլինի միայն այն դեպքում, երբ փոխվի կառավարման հին մոդելը:
Նախկին օմբուդսմենը համոզված է, որ Հայաստանում հասարակությունը եւ կառավարությունը պետք է շահագրգռված լինեն արդյունավետ եւ մրցունակ ընդդիմութան ձեւավորմամբ, քանի որ այն կարող է լինել վերոհիշյալ հակակշռի տարրերից մեկը: «Ընտրություններում բարձր տոկոսը մարդկանց ուրախացնում է, բայց բոլորովին չի վկայում տալիս ժողովրդավարության բարձր կամ բավարար մակարդակի մասին», - ասաց իրավապաշտպանը:
Լարիսա Ալավերդյանը նշեց, որ իշխող թիմին շատ բան ներվում է, այդ թվում, փորձի պակասը, սակայն կառավարությունը պետք է պատրաստ լինի համապատասխան պայմաններ ստեղծել երկրում ընդդիմության զարգացման եւ ամրապնդման համար, ինչը թույլ կտա հանրապետության ղեկավարությանը իրական մրցակցության առկայության հաշվին բարձրացնել իր մակարդակը:
Սակայն, ըստ փորձագետի, կուսակցություններում, որպես կանոն, գործում է նույն ավտորիտարիզմը, ինչպպես եւ կառավարման համակարգում: Նա համոզված է, որ կուսակցությունները պետք է հիմնվեն եւ ձեւավորվեն ոչ թե մեկ մարդու, այլ միասնական գաղափարի, հավասարության եւ իշխանության հասնելու ցանկության հիման վրա:
Միեւնույն ժամանակ, նրա կարծիքով, ներկա իրավիճակում կա հասարակության եւ հասարակական կազմակերպությունների մասնակի մեղքը բնակչության լուսավորության ուղղությամբ անբավարար աշխատանքի պատճառով:
Հայաստանում քաղաքական մշակույթը գտնվում է շատ ցածր մակարդակի վրա: «Հիմա այս հարցում մեծ պատասխանատվություն է կրում նաեւ վարչապետ Նիկոլ Փաշինյանը, քանի որ նա պետք է շահագրգռված լինի երկրում բարձրորակ քաղաքական մշակույթ ձեւավորելու եւ բնակչության լուսավորության մակարդակը բարձրացնելու ուղղությամբ», - եզրափակեց Լարիսա Ալավերդյանը: