Ազգային ժողովի նախկին պատգամավոր Հարություն Ղարագյոզյանի՝ «Կարամելի Հարութի» ինքնասպանության դեպքի առթիվ քրեական գործ է հարուցվել։ Այս մասին հայտնում են ՀՀ քննչական կոմիտեից։
Այսօր՝ հոկտեմբերի 7-ին, առավոտյան Կոտայքի մարզի Զովունի գյուղի տարածքում գտնվող քարի արտադրամասում հայտնաբերվել է Հարություն Ղարագյոզյանի դին՝ գլխին հրազենային վնասվածքով։
Դեպքի առթիվ հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով, այն է՝ ինքնասպանության հասցնելը:
Անմիջապես դեպքի վայր է մեկնել քննչական-օպերատիվ խումբը: Կատարվել է դեպքի վայրի զննություն:
Քրեական գործի համար էական նշանակություն ունեցող հանգամանքները պարզելու նպատակով նշանակվել են փորձաքննություններ:
Ձեռնարկվում են անհրաժեշտ քննչական գործողություններ՝ դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ:
Նախաքննությունը շարունակվում է:
Նշենք, որ Ղարագյոզյանը կասկածվում է ԱԺ նախկին պատգամավոր Կարո Կարապետյանի սպանությունը կատարելու մեջ:
'