Եվրասիական տնտեսական միությունում գազի ընդհանուր շուկայի ստեղծման գործընթացը կարող է արագացվել եւ լիարժեք աշխատել արդեն 2023 թվականին, այլ ոչ 2025-ին, ինչպես նախատեսված է պայմանավորվածություններով: Այս մասին հայտարարել է Եվրասիական տնտեսական հանձնաժողովի էներգետիկայի դեպարտամենտի տնօրեն Լեոնիդ Շենեցը՝ ելույթ ունենալով Բելառուսական էներգետիկ եւ բնապահպանական համաժողովում, փոխանցում է ՏԱՍՍ-ը:
«Անդամ երկրների կողմից բարի կամք դրսեւորելու դեպքում գազի շուկան կարող է գործել ոչ 2025 թվականի հունվարի 1-ից: Այն կարելի է կրճատել նվազագույնը մինչեւ 2023 թվականի հունվարի 1-ը: Սակայն դրա համար անհրաժեշտ է պայմանագիրն ընդունել, ակտեր մշակել եւ բոլոր պայմանները ստեղծել, որպեսզի շուկան աշխատի»,- ասել է ԵՏՀ դեպարտամենտի ղեկավարը:
Շենեցը հստակեցրել է, որ գազի ընդհանուր շուկայի ստեղծում նախատեսող պայմանագրի նախագիծը պետք է պատրաստ լինի 2021 թվականին, որի ստորագրումը նախատեսված է 2022 թվականին: ԵՏՀ դեպարտամենտի ղեկավարի խոսքով՝ ապագայում «գազի արժեքի ձեւավորման ինդիկատոր պետք է դառնա բորսային առեւտուրը»:
«Կարծում եմ, որ եթե ամեն ինչ հաջող ընթանա, ապա 2019-ի հուլիսի 1-ին ընդհանուր շուկայի ստեղծման մասին միջազգային պայմանագիրը կընդունվի»,- նշել է Շենեցը:
Նա տեղեկացրել է, որ այս պայմանագրի նախագիծը մշակվել է ու ուղարկվել ԵՏՄ երկրներին ներպետական ընթացակարգերն անցնելու համար:
Դեպարտամենտի ղեկավարը հայտնել է, որ ներկայումս ԵՏՄ շրջանակում ընդունվել է նաեւ էլեկտրաէներգիայի ընդհանուր շուկայի ձեւավորման հայեցակարգ եւ ծրագիր, սակայն անհրաժեշտ է եւս մի շարք նորմատիվ ակտերի մշակում: