Սեւ ծովում խորտակվել է Պանամայի դրոշի ներքո լողարկող ջերմանավ՝ մետաղի ջարդոնի բեռով, «ՌԻԱ Նովոստի»-ին հայտնել է Ռուսաստանի Սեւծովյան նավատորմի մամուլի ծառայության ներկայացուցիչը:
Նրա խոսքով՝ նավը դուրս էր եկել Ազով նավահանգստից եւ գտնվում էր ափից 50 մղոն հեռավորությամբ: Այն խորտակվել է 1,9 հազար մետր խորության վրա:
«Նավի կապիտանից աղետի ազդանշան էր ստացվել ջերմանավի կողաթեքման մեծացման մասին: Անձնակազմի բոլոր անդամներին՝ Թուրքիայի երկու եւ Ադրբեջանի 6 քաղաքացիներին փրկել են»,- ասել է գործակալության զրուցակիցը:
Հիմա հունական լցանավը նավաստիներին տարհանում է Նովոռոսիյսկ: Նրանց կյանքին եւ առողջությանը վտանգ չի սպառնում:
«Առայժմ դժվար է խոսել խորտակման պատճառների մասին, բայց քանի որ ջերմանավը մետաղի ջարդոն էր տեղափոխում, ապա, նախնականորեն, արտակարգ պատահարին կարող էր հանգեցնել սովորականից ավելի գերբեռնումը»,- հավելել է գործակալության զրուցակիցը:
