Ամերիաբանկը 2018թ․ հաճախորդային բազայի երկու անգամ աճ է ակնկալում։ Բանկի հաճախորդների թիվը մեծ տեմպերով է աճում։ Նման կարծիք հոկտեմբերի 17-ին լրագրողների հետ հանդիպմանը հայտնեց տնօրինության անդամ, «Ամերիաբանկ» ՓԲԸ-ի մանրածախ բանկինգի տնօրեն Արման Բարսեղյանը։
Նրա խոսքերով՝ բանկի համար այդ միտումը որոշակի մարտահրավեր է, քանի որ այն սպասարկման որակի ապահովման հարցում դժվարությունների պատճառ կարող է դառնալ։
«Նման իրավիճակը բոլոր գործընթացների թվայնացում է թելադրում, եւ մենք մտադիր ենք մոտակա 1-2 տարիների ընթացքում լիովին թվայնացնել բանկային սպասարկումը։ Օրինակ, մեկ տարի առաջ բանկի մասնաճյուղերում սպառողական վարկի եւ անժամկետ վարկի տրամադրումը միջինը 4-5 օր էր տեւում։ Այժմ բանկում ներդրված վարկային արագությունը վարկառուներին թույլ է տալիս վարկը հաշված րոպեներում ստանալ։ Բանկը նաեւ աշխատում է հիփոթեկային եւ ավտովարկերի թվայնացման ուղղությամբ»,- նշեց բանկիրը։
«Սրա հետ մեկտեղ, բանկային ծառայությունների թվայնացումը չի նշանակում, որ բանկին անհրաժեշտ չեն լրացուցիչ մասնաճյուղեր։ Այսպես, բանկը մտադիր է հետագա վեց ամիսների ընթացքում մասնաճյուղային ցանցը 20 տոկոսով մեծացնել։ Նոր մասնաճյուղեր կբացվեն Երեւանի Նոր Նորք, Կենտրոն համայնքներում եւ Աբովյան քաղաքում»,- ասաց Բարսեղյանը։
«Միաժամանակ, մենք փոփոխել ենք որոշ մասնաճյուղերի աշխատանքային գրաֆիկը, ինչը 50 տոկոսով բեռնաթափել է մասնաճյուղային ցանցը։ Բանկը նաեւ հետեւողականորեն մեծացնում է իր բանկոմատների թիվը՝ տարեկան 15 հատ։ Իսկ հաջորդ տարի մտադիր է 20 բանկոմատ տեղադրել։ Բացի այդ, մենք միացել ենք Easy Pay, MobiDram, TelCell, Idram վճարային համակարգերին»,- պարզաբանեց նա։