Ազգային ժողովի նախագահ Արա Բաբլոյանը վստահ է, որ Ընտրական օրենսգրքում փոփոխություններ կատարելու մասին օրինագծի տապալման մեջ ՀՀԿ–ականները որեւէ մեղավորություն չունեն։ Այսօր՝ հոկտեմբերի 23–ին, խորհրդարանում լրագրողների հետ զրույցում Արա Բաբլոյանը հորդորեց ազնիվ լինել դիրքորոշումների եւ հայտարարությունների մեջ։
«Ի պատասխան Տիգրան Ուրիխանյանի հարցի էլ՝ ես առավոտյան ասել եմ, որ ՀՀԿ–ն արդեն փոքրամասնություն է, եւ երեւի թե 40 մարդ չկա, եւ ազնիվ չէ դնել պատասխանատվությունն ընդդիմության վրա, որ համաձայն չէ կարճ ժամկետում կատարել լուրջ փոփոխություններ, չնայած հայտարարել է, որ համաձայն է դեկտեմբերին գնալ ընտրությունների։
Մեր խմբակցությունը հայտարարել է, որ վարչապետի թեկնածու չի առաջադրելու, չի խոչընդոտելու, որ ընտրություններն անցկացվեն դեկտեմբերին։ Նրանք, ովքեր չեն եկել, իրենց պարտավորությունը չեն կատարել, հիմա իրենց վրա է դրված ստորագրահավաք կազմակերպելն ու արտահերթ նիստ հրավիրելը»,– ասաց Արա Բաբլոյանը՝ ակնարկելով «Ծառուկյան» խմբակցությանը, որի ոչ բոլոր պատգամավորներն էին երեկ մասնակցում քվեարկությանը։
ԱԺ նախագահը հիշեցրեց, որ նախօրեին ինքը կարող էր անմիջապես քվեարկության դնել օրինագիծը, սակայն, ժամանակ տվեց պատգամավորներին, որ եթե ցանկություն ունեն դիրքորոշում հայտնելու նախագծի վերաբերյալ, գան եւ քվեարկեն։
Թե ինչպես է ՀՀԿ–ն քվեարկելու երկուշաբթի օրը, Արա Բաբլոյանը նշեց, որ դեռեւս չեն քննարկել։ Նշենք, որ «Ծառուկյան» եւ «Ելք» խմբակցությունների նախաձեռնությամբ՝ երկուշաբթի արտահերթ նիստ է հրավիրվելու՝ քննարկելու ԸՕ փոփոխությունների օրենքի նախագիծը։
Դիտարկմանը, թե կարծիք կա, որ ՀՀԿ–ի երեկվա քայլը սաբոտաժ է, ԱԺ նախագահը չհամաձայնվեց. «Սաբոտաժ չէ, քաղաքական պայքար է»:
Անդրադառնալով վարչապետի ընտրությանը, Արա Բաբլոյանը վստահեցրեց, որ վարչապետի ընտրության ժամանակ ցնցումներ չեն լինի. «Կարծում եմ՝ կկանոնակարգվի ամեն հարց այնպես, որ որևէ ցնցում չի լինի»։
Ավելի վաղ NEWS.am-ը հայտնել էր, որ Ազգային ժողովի արտահերթ նիստում Ընտրական օրենսգրքի փոփոխությունները չընդունվեցին: Օրինագծին կողմ քվեարկեց 56, դեմ 3 պատգամավոր, մինչդեռ անհրաժեշտ է 63 կողմ ձայն: Նշենք, որ օրենքը սահմանադրական է, և հարկավոր էր պատգամավորների ընդհանուր թվի առնվազն 3/5-ի քվեն՝ 63 ձայն: