Շաբաթ առավոտյան Ֆրանսիայի նախագահ Էմանուել Մակրոնը իր ռուսաստանցի գործընկեր Վլադիմիր Պուտինի հետ հեռախոսազրույց է ունեցել նախքան սիրիական կարգավորման հարցով քառակողմ գագաթնաժողովը, որն անցկացվելու է Ստամբուլում, հայտնում է BFM TV-ն:
Ելիսեյան պալատում աղբյուրը հայտնել է, որ զրույցի ընթացքում Մակրոնը, մասնավորապես, շեշտել է սիրիական հակամարտության քաղաքական կարգավորման անհրաժեշտությունը:
Մակրոնը նաեւ ցանկանում է, որ գագաթնաժողովի մասնակիցները խոստանան թույլ չտալ քիմիական զենքի կիրառում, ինչպես նաեւ ապահովեն հրդադադարի ռեժիմի երկարաժամկետ պահպանում՝ հումանիտար աղետից խուսափելու համար:
Կրեմլի մամուլի ծառայությունը նման զրույցի մասին առայժմ չի հայտնել:
Ելիսեյան պալատում Ստամբուլում կայանալիք գագաթնաժողովը «օգտակար ձեւաչափ» են համարում: Մակրոնի շրջապատի ներկայացուցիչների կարծիքով՝ նման կազմով հանդիպումները, հնարավոր է, չդառնան պարբերական, բայց կարող են նպաստել բանակցային ձեւաչափերին մոտենալուն:
Մակրոնը հոկտեմբերի 25-ին Սիրիայի իրավիճակը հեռախոսազրույցում քննարկել էր ԱՄՆ նախագահ Դոմալդ Թրամփի հետ:
Սիրիական կարգավորման հարցով քառակողմ գագաթնաժողովը տեղի է ունենալու շաբաթ Ստամբուլում: Մասնակցելու են ՌԴ նախագահ Վլադիմիր Պուտինը, Գերմանիայի կանցլեր Անգելա Մերկելը, Ֆրանսիայի նախագահ Էմանուել Մակրոնը եւ Թուրքիայի նախագահ Ռեջեփ Թայիփ Էրդողանը: