ՀՀ էներգետիկ ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանը նոյեմբերի 2-ին Աստանայում մասնակցել է Անկախ Պետությունների Համագործակցության (ԱՊՀ) երկրների էլեկտրաէներգետիկական խորհրդի 53-րդ նիստին:
Նախարարությունից NEWS.am-ին հայտնում են, որ նախարարի պաշտոնակատարը ներկայացրել է Հայաստանի էներգետիկայի բնագավառը, զարգացման հիմնական ուղղություններն ու հեռանկարները: Անդրադարձել է Հայաստանում ատոմային էներգետիկայի զարգացման, առաջնային էներգետիկ պաշարների դիվերսիֆիկացման եւ գազային ջերմակայանների արտադրողականության արդյունավետության բարձրացման խնդիրներին։
Գարեգին Բաղրամյանն իր ելույթում ներկայացրել է Հայաստանի ներքին սպառման կառուցվածքում սեփական վերականգնվող աղբյուրներից ստացվող էլեկտրաէներգիայի տեսակարար կշռի շարունակական ավելացման ուղղությամբ իրականացվող քայլերը:
Նիստում քննարկվել են էներգահամակարգերի 2018-2019թթ. աշուն-ձմեռ նախապատրաստական աշխատանքները, ԱՊՀ երկրների էներգետիկայի բնագավառում համագործակցության պլանով նախատեսված միջոցառումները, սարքավորումների հուսալիությանը, էներգախնայողությանն ու արդյունավետությանը, ինչպես նաեւ ոլորտի խնդիրներին առնչվող մոտ 3 տասնյակ այլ հարցեր:
Խորհրդի 53-րդ նիստի ընթացքում ԱՊՀ էլեկտրաէներգետիկական խորհրդի նախագահ է վերընտրվել ՌԴ էներգետիկայի նախարար Ալեքսանդր Նովակը (3 տարի ժամկետով), որի թեկնածությունն առաջարկել է ՀՀ էներգետիկ ենթակառուցվածքների եւ բնական պաշարների նախարարի պաշտոնակատարը:
Աշխատանքային այցի շրջանակում Գարեգին Բաղրամյանն հանդիպումներ է ունեցել ՌԴ էներգետիկայի նախարար Ալեքսանդր Նովակի, Ղազախստանի էներգետիկայի նախարար Կանատ Բոզումբաեւի հետ:
ԱՊՀ երկրների էլեկտրաէներգետիկական խորհրդի 53-րդ նիստին մասնակցել են Հայաստանի, Ռուսաստանի, Ղազախստանի, Ուզբեկստանի, Ադրբեջանի, Ղրղզստանի ու Տաջիկստանի էներգետիկայի էներգետիկայի նախարարները:
