«ՀՀ 2019թ. պետական բյուջեի մասին» ՀՀ օրենքի նախագծով Արտակարգ իրավիճակների նախարարությանը կհատկացվի 12 մլրդ 571 մլն դրամ, որը նախորդ տարվա բյուջեի համեմատ ավելի է 1 մլրդ 593 մլն դրամով, կան 12,3 տոկոսով: Այս մասին, այսօր՝ նոյեմբերի 6-ին, ԱԺ պաշտպանության ն եւ անվտանգության հարցերով հանձնաժողովի նիստում բյուջեի քննարկմանն ասաց Արտակարգ իրավիճակների փոխնախարարի պաշտոնակատար Արա Նազարյանը:
Նրա խոսքով, այդ բյուջեից 9 մլրդ դրամը կամ 71,7 տոկոսը կազմել է աշխատավարձը, 1,771 մլրդ դրամը կամ 13,6 տոկոսը կազմել է պարգեւատրման եւ հատուկ վճարների ֆոնդն է, իսկ մնացած 1,841 մլրդ դրամը՝ համակարգի ստորաբաժանումների, հիմնարկների պահպանման ծախսերը:
Նազարյանը նշեց, որ տեխնիկա ձեռք են բերում միջազգային համագործակցության, բարեգործական ծրագրերից, մասնավորապես՝ ռուսական, նաեւ չինական կառավարություններից: Մասնավորապես, 2019 թվականին նախատեսված է Ճապոնիայի կառավարությունից ստանալ 39 միավոր տեխնիկա, իսկ հայ-ռուսական հումանիտար կենտրոնի կողմից 65 միավոր տեխնիկա:
ԱԺ ՀՀԿ խմբակցության պատգամավոր Կորյուն Նահապետյանն իր խոսքում նշեց, որ պետք է արմատապես վերանայել արտակարգ իրավիճակների ոլորտում բյուջետային քաղաքականությունը. «Պետք է փոխել ձեւավորված մոտեցումը, որ հույսը պետք է դնել միջազգային գործընկերների վրա, նայենք, թե ինչ միջոցներ պետք է տան, որ կարողանանք այս կամ այն չափով որեւէ խնդիր լուծենք»,-ասաց նա: Արա Նազարյանն էլ նկատեց, որ խնդիրը միջոցներն են, եթե լինեն համապատասխան միջոցներ, կարելի է առկա խնդիրներին լուծումներ գտնել:
Փոխնախարարի պաշտոնակատարն ընդգծեց, որ սեյսմիկ ծառայության, նաեւ հիդրոօդերեւութաբանության տեսակետից ունեն խնդիր տեխնիկան արդիականացնելու եւ թվային տեխնիկայով համալրելու ծառայությունը, որ կանխորոշեն հնարավոր երկրաշարժերը եւ գյուղատնտեսական ոլորտի հետ անմիջական կապի մեջ մտած հակակարկտային զարգացումը:
«Խնդիրներ ունենք վաղ ազդարարման համակարգի զարգացման ոլորտում՝ անտառային հրդեհների կանխարգելման հետ կապված համապատասխան պլանի կիրառումը շահագրգիռ գերատեսչությունների հետ: Այլ խնդիրներ էլ կան, ավելի լուրջ, բայց բաց ռեժիմի քննարկման հարց չէ»,-ասաց նա: