Պետպատվերի պայմանագրերը կնքվում են բուժհաստատությունների հետ տարվա սկզբում տարբեր սկզբունքների հիման վրա. հիմնական սկզբունքը, որ գործել է, դա նախորդ տարվա գումարների վրա հիմնվելն է, բայց մենք այդ տրամաբանությունը փոխելու ենք: Այս մասին, այսօր՝ նոյեմբերի 7-ին, ՀՀ Ազգային ժողովի առողջապահության եւ սոցիալական հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում 2019 թվականի բյուջեի նախագծի քննարկման ժամանակ նշեց առողջապահության նախարարի պաշտոնակատար Արսեն Թորոսյանը:
Նրա խոսքով, իրենք որոշ ծառայությունների գծով գումարների չափը կապելու են նմանատիպ ծառայությունների գծով վճարովի ծառայությունների հետ. «Վճարովի ծառայությունների թիվը ուղղակիորեն ցուցիչ է այս կամ այն բժշկական կենտրոնի արդյունավետության եւ որակի: Չի ստացվելու այնպես, որ հիվանդանոցներն անհավասար պայմաններում են լինելու պետպատվեր ստանալու հարցում: Հնարավոր է, պայմանագրերը կնքվեն ոչ թե մեկ տարով, այլ ավելի կարճատեւ եւ հետո վերանայվեն»,-ասաց նա:
Արսեն Թորոսյանը նշեց, որ նաեւ կիրառվելու է սպասարկվող բնակչության թվի սկզբունքը. «Դա մասնավորապես վերաբերվելու է մարզային հիվանդանոցներին, որտեղ մեկ հիվանդանոց է, մրցակցություն չկա»,-ասաց նա հավելելով, որ առողջապահական ոլորտում ֆինանսական մեխանիզմը կփոխվի եւ պետությունը նախապես չի տա որեւէ գումար որեւէ բուժհաստատության, երբ կներդրվի ապահովագրական համակարգը: