Սա ազգային խնդիր է, չի կարելի այդպես վիրավորել մեզ: NEWS.am-ի հետ զրույցում այսպիսի կարծիք հայտնեց Արցախի Հանրապետության նախկին ՄԻՊ Ռուբեն Մելիքյանը՝ անդրադառնալով վարչապետի պաշտոնակատար Փաշինյանի հայտարարության պաշտոնական Մինսկի աձագանքին:
«Արդեն էական չէ, թե ինչու այս խնդիրն առաջացավ. այս պահին էական չէ, քանի որ սա արդեն ազգային խնդիր է, չի կարելի էդպես, ի՞նչ է նշանակում փողոցային դեմոկրատիա, դա մեր ներքին խնդիրն է: Մինսկի արձագանքը շատ կոշտ էր, անհամաչափ կոշտ էր: Բելառուսի ԱԳՆ հայտարարությունը պարունակում էր մեր հանդեպ վիրավորանք ու մեծամտություն։ Ու սա վիրավորանք է յուրաքանչյուրիս՝ անկախ քաղաքական հայացքներից»,- ասաց Ռուբեն Մելիքյանը:
Ռուբեն Մելիքյանի կարծիքով՝ Երեւանի պատասխանը պետք է լինի համարժեք եւ չուշանա:
Հիշեցնենք, որ նախօրեին Հայաստանի վարչապետի պաշտոնակատար Նիկոլ Փաշինյանը հայտարարել էր, որ պարզաբանումներ է պահանջելու Բելառուսի նախագահ Ալեքսանդր Լուկաշենկոյից՝ ՀԱՊԿ-ում ստեղծված իրավիճակը կազմակերպության ոչ անդամ երկրի՝ Ադրբեջանի հետ քննարկելու համար։
Նիկոլ Փաշինյանը նաեւ նշել էր, որ պարզաբանումներ է պահանջելու Ղազախստանի նախագահ Նուրսուլթան Նազարբաեւից ընդհանուր պայմանավորվածություններին հակասող հայտարարությամբ հանդես գալու համար: Մասնավորապես, ՀԱՊԿ գագաթնաժողովի նիստից հետո նա հայտարարել էր, որ կազմակերպության գլխավոր քարտուղարի պաշտոնում կնշանակվի Բելառուսի ներկայացուցիչը
Նիկոլ Փաշինյանը պարզաբանումներ է պահանջելու Լուկաշենկոյից եւ Նազարբաեւից https://news.am/arm/news/481501.html
