ՀԱՊԿ-ում հարաբերությունները շատ բարդացել են հատկապես գլխավոր քարտուղարի վերաբերյալ տեղի ունեցածից հետո: Այս մասին NEWS.am-ի թղթակցի հետ զրույցում ասաց գեներալ-լեյտենանտ Նորատ Տեր-Գրիգորյանցը:
Տեր-Գրիգորյանցի խոսքով՝ ՀԱՊԿ-ն իր խնդիրները կատարում է, բայց, ցավոք, երբեմն ՀԱՊԿ գործառույթներն ամբողջությամբ չեն իրականացվում:
«Իմ կարծիքով՝ այնտեղ, ըստ երեւույթին, ինչ-որ քաղաքականություն մի փոքր փոփոխվում է՝ ելնելով Կովկասում ստեղծված ռազմա-քաղաքական իրավիճակից: Օրինակ՝ Ադրբեջանի ԶՈւ կողմից Նոյեմբերյանը գնդակոծվում է, իսկ ՀԱՊԿ-ը լռում է, մինչդեռ Հայաստանը ՀԱՊԿ անդամ է, եւ կազմակերպության կողմից ինչ-ինչ ներգործություններ պետք է լինեն: Կամ Նախիջեւանում հանդես է գալիս Ադրբեջանի նախագահը, որտեղ է գտնվում նաեւ ՆԱՏՕ-ի անդամ Թուրքիայի նախագահը, եւ պարծենում է, թե Հայաստանին մեկուսացնում է, հարձակվում ենք Երեւանի վրա, իսկ ՀԱՊԿ-ում լռում են: Այս տեսանկյունից, ես, օրինակ, նման բաներին քննադատաբար եմ վերաբերվում, չնայած պետք է ՀԱՊԿ-ում մնալ, պետք է հավատարմության օրինակ ցույց տալ կազմակերպության բոլոր երկրներին: Օրինակ՝ քանի որ Ուկրաինայի եւ Ռուսաստանի միջեւ դիմակայություն կա, եւ Ուկրաինան սպառնում է հարձակվել Ղրիմի, այսինքն՝ ՌԴ-ի վրա, ապա Հայաստանը, որպես ՀԱՊԿ անդամ երկիր, պայքարի համար հատկացված իր միջոցներով եւ անձնակազմով պետք է ՌԴ-ին օգնություն ցույց տա: Այսպիսով, ես խնդրում եմ, որ ճիշտ նույն կերպ ՀԱՊԿ-ում իրավիճակի վրա ներգործեն եւ արձագանքեն: Սա իմ վերաբերմունքն է արդարությանը, պատվին եւ արժանապատվությանը: ՀԱՊԿ-ը պետք է կատարի իր վրա դրված գործառույթը»,- նշեց գեներալ-լեյտենանտը: