Դեկտեմբերի 3-ին Երեւանում նշել են Միացյալ Արաբական Էմիրությունների (ԱՄԷ) հիմնադրման 47-ամյակը:
Միջոցառմանը ներկա էին Հայաստանում հավատարմագրված դիվանագիտական առաքելությունների ներկայացուցիչներ, կառավարության ներկայացուցիչներ եւ այլ հյուրեր:
Իր ողջույնի խոսքում Հայաստանում Արաբական Միացյալ Էմիրությունների դեսպան Ջասիմ Մուհամմեդ Ալ Կասիմին նշել է, որ երկրների միջեւ հարաբերությունները վերջին տարիներին հասել են ռազմավարական գործընկերության մակարդակի:
Նրա խոսքով, երկրների միջեւ տնտեսական եւ մշակութային կապերը մշտապես զարգանում են, եւ հարաբերությունների զարգացման ցուցանիշը առեւտրի աճն է: «Հայաստանի տնտեսության մեջ ԱՄԷ-ի գործարար հատվածի վստահությունը մեր բարեկամ երկրների միջեւ տնտեսական հարաբերությունների զարգացման եւ Հայաստանում ներդրումների ավելացմանն է հանգեցրել», - ասել է դեսպանը:
Ջասիմ Մուհամմեդ Ալ Կասիմին ընդգծել է, որ երկրների միջեւ ապրանքաշրջանառությունն անցյալ տարի հասել է 250 մլն դոլարի:
Իր հերթին փոխվարչապետ Տիգրան Ավինյանը նշել է, որ այս տարի երկրները նշում են դիվանագիտական հարաբերությունների հաստատման 20-ամյակը, եւ արձանագրվել է առաջընթաց երկու երկրների միջեւ համագործակցության բոլոր բնագավառներում: Ավինյանը նշել է, որ իրենք ակնկալում են Հայաստանի եւ Արաբական Միացյալ Էմիրությունների կառավարությունների միջեւ համատեղ հանձնաժողովի առաջին հանդիպումը:
«Ես վստահ եմ, որ համատեղ ջանքերի շնորհիվ մենք կկարողանանք երկու ժողովուրդների միջեւ բարեկամական հարաբերությունների շահերի շրջանակներում խթանել երկկողմ համագործակցությունը եւ տարբեր ոլորտներում երկրների միջեւ հարաբերությունները խորացնել», - ասել է նա՝ շնորհակալություն հայտնելով ԱՄԷ-ին Էմիրաթներում հայ համայնքի հոգատարության համար: