Չինաստանը Կանադային լուրջ հետեւանքների մասին է զգուշացրել, եթե հրաժարվի անհապաղ ազատել Huawei Technologies Co Ltd-ի ֆինանսական տնօրենին, այս գործը «չափազանց տհաճ» որակելով, փոխանցում է Reuters-ը:
Huawei-ի գլխավոր ֆինանսական տնօրեն Մեն Վանչժոուն դեկտեմբերի 1-ին Կանադայում կալանավորվել է եւ կատաքսվի ԱՄՆ, որտեղ պնդում են, որ նա թաքցրել է իր ընկերության կապերը, որը փորձել է Իրանին սարքավորումներ վաճառել, չնայած պատժամիջոցներին: Միացյալ Նահանգներին հանձնելու դեպքում Մենը կմեղադրվի մի քանի ֆինանսական հաստատություններին խաբելու նպատակով դավադրության մեջ: Նրան յուրաքանչյուր հանցագործության համար 30-ական տարվա բանտարկություն է սպառնում:
Կանադական դատարանը դեռեւս չի ընդունել նրան արտահանձնելու որոշում:
Չինաստանի ԱԳ նախարարությունը հայտնել է, որ երկրի ԱԳ փոխնախարար Լե Յույչենը Պեկինում Կանադայի դեսպանին զգուշացրել է Մենին ազատելու անհրաժեշտության մասին:
Լեի խոսքով՝ ԱՄՆ խնդրանքով Մենի ձերբակալությունը, որը տեղի է ունեցել Վանկուվերում օդանավը փոխելու պահին, նրա օրինական իրավունքների լուրջ խախտում է:
«Չինաստանը կանադական կողմին համառորեն կոչ է անում ձերբակալվածին անհապաղ ազատել եւ նրա օրինական իրավունքներն ազնվորեն պաշտպանել, հակառակ դեպքում Կանադան պետք է ստանձնի հաջորդող լուրջ հետեւանքների ամբողջ պատասխանատվությունը»,- ասել է նա:
