2019 թվականին Եվրամիության բյուջեն հաստատվել է 148.2 մլրդ եվրոյի չափով, ինչը 2.4 տոկոսով ավելի է, քան 2018 թվականին, հաղորդում է ՏԱՍՍ-ը:
«Դեկտեմբերի 11-ին Խորհուրդը Եվրախորհրդարանի հետ հաստատել է 2019 թ. ԵՄ բյուջեի վերաբերյալ համաձայնագիրը: Այս բյուջեի շրջանակներում ընդհանուր ֆինանսական պարտավորությունները սահմանված են 165.8 մլրդ եվրոյի չափով, ինչը 3.2 տոկոսով գերազանցում է 2018 թվականի նույն ցուցանիշը, ընդհանուր վճարումները`148.2 մլրդ եվրո, ինչը 2.4 տոկոսով ավելի է նախորդ տարվա ցուցանիշից» - ասվում է փաստաթղթում:
ԵՄ բյուջեի վճարումները բոլոր այն ծախսերն են, որոնք 2019 թվականին ԵՄ բյուջեն պետք է ծածկի: Ֆինանսական պարտավորությունները առավելագույն թույլատրելի գումարն է, որով Բրյուսելը կարող է ցանկացած իրավական պարտավորություն կատարել՝ ծրագրեր եւ պայմանագրեր կնքել, բայց դրանց համար վճարումը կարող է հաշվարկվել մի քանի տարիների ընթացքում, եւ պարտադիր չէ, որ գումարները վճարվեն ընթացիկ տարվա ընթացքում:
2019-ի հիմնական ծախսերը նախատեսված են կայուն տնտեսական աճի ապահովման ծրագրերի համար` 57.4 միլիարդ եվրո, հետամնաց շրջանների զարգացման համար` 47 միլիարդ եվրո, երրորդ տեղում` աճի եւ զբաղվածության եվրոպական մրցունակության աջակցության ծրագիրն է` 20.5 միլիարդ եվրո: ԵՄ ինստիտուտների վարչական ծախսերի համար հատկացվել է 9.95 մլրդ եվրո: