Ադրբեջանի ընդդիմադիր քաղաքական գործիչները պահանջել են իրավապահ մարմինների կողմից քննել կոռուպցիայի եւ փողերի լվացման փաստերը, որոնք հայտնաբերվել էին «ադրբեջանական լվացքատան» գործի քննությամբ:
Turan-ը հայտնում է, որ բրիտանական իշխանությունները սառեցրել են մի քանի միլիարդ դոլարի հաշիվները, որոնք կապված են Ադրբեջանից կեղտոտ փողերի լվացման հետ: Հանցավորության դեմ պայքարի ազգային գործակալության (NCA) տվյալներով՝ հաշիվների սառեցման օրդերը առաջին քայլն է կեղտոտ փողերի լվացման դեմ պայքարում:
Մեկնաբանելով տեղի ունեցածը՝ Ժողովրդավարական ուժերի ազգային խորհրդի ղեկավար Ջամիլ Հասանլին կարծիք է հայտնել, որ առաջին հերթին Ադրբեջանի իրավապահ մարմինները պետք է քննեն այդ փաստերը, մասնավորապես՝ ԱՄՆ քաղաքացի Քեմալ Օքսյուզի ցուցմունքները: Նա խոստովանել է, որ մասնակցել է SOCAR-ի միջոցներով Բաքու ամերիկացի կոնգրեսականների ուղեւորությունների ֆինանսավորմանը:
Հասանլին ասել է, որ Ադրբեջանից ապօրինաբար դուրս են բերվել պաշտապանության համար նախատեսված միջոցները: Չնայած միջազգային մակարդակով այս փաստերի բացահայտմանը եւ արտասահմանյան հակակոռուպցիոն հանձնաժողովներում քննությանը, պաշտոնբական Բաքուն շարունակում է լռել: «Ինչո՞ւ երկրի ղեկավարությունը եւ գլխավոր դատախազը այս փաստերն իրենց անձնական հսկողության տակ չեն վերցնում»,- հեգնանքով նշել է Հասանլին իր Facebook-յան էջում:
Ադրբեջանի Ազգային ճակատ կուսակցության առաջնորդ Ալի Քերիմլին նույնպես նշել է, որ կոռուպցիայի եւ փողերի լվացման փաստերը վաղ թե ուշ պետք է բացահայտվեին: «Չէ՞ որ մենք ասում էինք, որ դուք չեք կարողանալու մինչեւ վերջ հանգիստ յուրացնել ժողովրդի, վետերանների, հաշմանդամների, երեխաների փողերը»,- նշել է Քերիմլին:
«Հիմա Ադրբեջանն ամբողջ աշխարհին հայտնի է որպես կոռուպցիայի երկիր: Դրա պատճառով երկրում ներդրումները կրճատվում են, իսկ խոշոր ընկերությունները երկրից հեռանում են: Իրենց վարքագծով իշխանությունները ստեղծում են երկրի բացասական իմիջ, ինչը դժվարացնում է բոլոր խնդիրների լուծումը, ներառյալ ղարաբաղյան հակամարտությունը»,- «Ամերիկայի ձայնի» ադրբեջանական ծառայությանն ասել է «Մուսավաթ» կուսակցության ղեկավար Արիֆ Հաջիլին:
«ՌԵԱԼ» կուսակցության առաջնորդ Իլգար Մամեդովը կարծում է, որ Մեծ Բրիտանիայում «ադրբեջանական լվացքատան» հետ կապված բանկային հաշիվների սառեցման մասին տեղեկությունները ոչ մի նոր բանի մասին չեն վկայում:
Նախկինում Լոնդոնում արդեն միջոցներ են ձեռնարկվել «Ադրբեջանի միջազգային բանկի» նախկին ղեկավարի կնոջ՝ Ջհանգիրա Հաջիեւայի դեմ: «Այդ ժամանակ մի շարք միջազգային դիտորդներ նշում էին, որ չարժի հետապնդել նրանց, ովքեր արդեն իրենց երկրում պատժվել են: Միջոցներ պետք է ընդունվեն նրանց դեմ, ովքեր դեռեւս իշխանության են»,- ասել է Մամեդովը «Ամերիկայի ձայնի» ադրբեջանական ծառայությանը: