Google ընկերության ղեկավարությունը ստիպված է հրաժարվել Չինաստանի համար հատուկ որոնման համակարգ ստեղծելուց, որը կհամապատասխաներ այդ երկրում վերահսկողության խիստ պահանջներին՝ գրում է «Կոմերսանտը»։

Ավելի վաղ հայտնում էին, որ Dragonfly հատուկ որոնողական համակարգը պետք է ջնջեր այն կոնտենտը, որ չինական իշխանություններն անցանկալի կհամարեին։ Բացի այդ, համացանցում որոնման պատմությունը պետք է կապվեր օգտատերերի հեռախոսահամարների հետ։

Ընկերությունն ինքը պաշտոնապես չի հաստատել Չինաստանի համար նման համակարգի ստեղծումը։ Անցյալ շաբաթ ԱՄՆ Կոնգրեսում լսումների ժամանակ Google-ի տնօրեն Սունդար Պիչայը հայտարարել է, որ Չինաստանի համար հատուկ համակարգի ստեղծման մասին լուրերը կեղծ են։

Միաժամանակ, նոյեմբերի վերջին Google-ի մոտ 500 աշխատակիցներ նամակ են գրել ղեկավարությանը, որի մեջ իրենց բողոքն են հայտնել այդպիսի որոնողական համակարգ ստեղծելու դեմ։ The Intercept-ի տվյալներով, այդ բողոքները, ինչպես նաեւ հակասությունները, որոնք ծագել են ընկերությունում, պատճառ են դարձել ծրագրի փակման համար։ Հայտնում են, որ Google-ի այն ինժեներները, ովքեր նախկինում զբաղվում էին այդ ծրագրով, այժմ նման նախագծեր են մշակում Հնդկաստանի, Ինդոնեզիայի, Ռուսաստանի եւ Բրազիլիայի համար։