Դեկտեմբերի 25-ին Հայաստանի Կոմունիստական կուսակցության ակտիվիստները ռուսական 102-րդ ռազմակայանի պահպանման աջակցության ակցիա են անցկացրել, որը տեղակայված է Գյումրիում, փոխանցում է NEWS.am-ի թղթակիցը:
Ակցիայի ժամանակ կուսակցությունը հայտարարություն է հրապարակել, որում խստորեն քննադատել է հայ հասարակության շրջանում հակառուսական տրամադրությունների տարածումը: «Մամուլում եւ հայ հանրության շրջանում դարձյալ ուժգնացել են հակառուսական տրամադրությունները, Հայաստանի թիվ մեկ ռազմավարական դաշնակցին հասցեագրված խիստ եւ չհիմնավորված մեղադրանքներ են հնչում: Մասնավորապես՝ Արեւմուտքի շահերը սպասարկող ուժերը փորձում են կենցաղային հողի վրա կատարված ողբերգական եւ տարօրինակ միջադեպն օգտագործել հերթական անգամ հայ եւ ռուս ժողովուրդների բազմադարյա բարեկամության մեջ սեպ խրելու եւ երկրում իրավիճակն ապակայունացնելու համար: Դատապարտելով երկրում ռուսական ընկերությունների դեմ ագրեսիվ հռետորաբանությունը, ինչպես նաեւ միտումնավոր բացասական վերաբերմունքը ռուսերենի նկատմամբ, որի ակնհայտ վկայությունն է «Ի՞նչ: Որտե՞ղ: Ե՞րբ» ինտելեկտուալ խաղը ռուսերենով անցկացնելու արգելքը, Հայաստանի Կոմունիստական կուսակցությունը հայ հասարակությանը կոչ է անում չտրվել քաղաքական արկածախնդիրների սադրանքներին»,- նշված է Կոմունիստական կուսակցության հայտարարության մեջ:
Ակցիային են միացել նաեւ Հայաստանի Միավորված առաջադեմ կոմունիստական կուսակցության ներկայացուցիչները:
