Բանակում պետք է ծառայեն բոլորը: Այս կարծիքն է հայտնել Հայաստանի պաշտպանության նախարար Սեյրան Օհանյանը` փետրվարի 22-ին Երեւանի պետական համալսարանի պրոֆեսորա-դասախոսական կազմի հետ ունեցած հանդիպման ժամանակ: Պատասխանելով բանակային ծառայությունից տարկետման միջոցով ազատված երիտասարդների մասին հարցին, Օհանյանն ընդգծեց, որ այդ երիտասարդները չեն խախտել օենքը: «Սակայն ես համաձայն եմ, որ պետք է ծառայեն բոլորը»,-նշեց նա:
Նախարարը միաժամանակ հավելեց, որ տարեցտարի աշխատանքներ են տարվում տարկետման միջոցով բանակային ծառայությունից ազատվողների թիվը կրճատելու ուղղությամբ:
Միջոցառման մասնակիցներից մեկը հետաքրքրվեց, թե ի՞նչ կարծիքի է նախարարը այն պաշտոնյաների մասին, ովքեր չեն ծառայել բանակում: Ամենայն հավանականությամբ, հարցը վերաբերում էր միջոցառմանը ներկա Կրթության եւ գիտության նախարար Արմեն Աշոտյանին: Օհանյանն ասաց, որ որոշ պաշտոնատար անձինք օրինական ճանապարհով ազատվել են ծառայությունից: Բացի Պաշտպանության նախարարից, հարցին որոշեց պատասխանել նաեւ Աշոտյանը, նշելով, որ բժշկական համալսարանում ուսանելը փոքր ինչ տարբերվում է, քանի որ համալսարանն ունի ռազմական ամբիոն:
