ԱՄՆ նախագահ Դոնալդ Թրամփը հանդես է եկել ամերիկացիներին հղած հատուկ հեռուստաուղերձով, որը նվիրված է «շաթդաունին», հայտարարելով Մեքսիկայի սահմանին ճգնաժամի մասին, փոխանցում է «ՌԻԱ Նովոստի»-ն:
Սպիտակ տան ղեկավարի խոսքով՝ խոսքը վերաբերում է ինչպես անվտանգության ոլորտում ճգնաժամին, այնպես էլ հումանիտար ճգնաժամին:
«Բոլոր ամերիկացիները տուժում են ապօրինի միգրացիայի պատճառով»,- հավելել է Թրամփը:
ԱՄՆ նախագահը հայտարարել է, որ հազարավոր մարդիկ կարող են զոհվել միգրացիայի հետ կապված հանցավորության պատճառով, որի թիրախում են հայտնվում ինչպես միգրանտները, այնպես էլ ամերիկացիները:
Թրամփը հույս է հայտնել, որ կառավարության «շաթդաունը» կդադարեցվի չորեքշաբթի Կոնգրեսի առաջնորդների հետ իր հանդիպման արդյունքների շնորհիվ: «Խնդրի միակ լուծումն այն է, որ դեմոկրատները ընդունեն ծախսերի մասին օրենքը, որը կպաշտպաներ մեր սահմանները եւ կառավարությունը կբացեր: Այս իրավիճակը կարող է կարգավորվել 45 րոպեում հանդիպման ժամանակ»,- ասել է նա:
ԱՄՆ նախագահը հավելել է, որ պատրաստ է դեմոկրատներին զիջման գնալ եւ արդեն չի պնդում, որ պատը բետոնե լինի՝ համաձայն է պողպատե պատնեշին:
Թրամփը, միաժամանակ, վստահություն է հայտնել, որ Մեքսիկայի սահմանին պատը «ծախսն արագ կփոխհատուցի», այդ թվում՝ Մեխիկոյի հետ ձեռնտու առեւտրային համաձայնագրի շնորհիվ:
«(ԱՄՆ-ում հայտնվող) ապօրինի թմրանյութերի արժեքը գերազանցում է տարեկան 500 մլրդ դոլարը, որը շատ ավելին է, քան 5,7 մլրդ դոլարը, որ Կոնգրեսից խնդրել ենք (պատի կառուցման համար): Պատի համար նաեւ կվճարվի միջնորդավորված՝ նոր առեւտրային համաձայնագրի հաշվին, որը ստորագրել ենք Մեքսիկայի հետ»,- հայտարարել է նա:
