Անթույլատրելի է Կարագանդայում սպանության միջադեպի քաղաքականացումը: Հունվարի 10-ին լրագրողների հետ հանդիպման ժամանակ այս մասին ասաց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:
Նրա խոսքով՝ նման փորձեր են կատարվում որոշ լրատվամիջոցների, ինչպես նաեւ համացանցի առանձին օգտատերերի կողմից:
«Ակնհայտորեն սա արվում է ադրբեջանական իշխանությունների կողմից՝ միջադեպից օգտվելու նպատակով: Ղազախստանի ամբողջ տարածքում նման միջադեպեր շատ հաճախ են տեղի ունենում: Այս դեպքը առիթ դարձավ հակահայկական տրամադրություններ հրահրելու համար: Ղազախստանի իշխանությունները ինչպես իրենց հայտարարություններով, այնպես էլ գործողություններով ցուցադրեցին ազգամիջյան կոնֆիկտների համար հող ստեղծելու ցանկության բացակայությունը»,- շեշտեց նա:
ՀԿ ղեկավարը նշեց, որ արտահանձնումը մշտապես քաղաքական երանգ է ունենում: «Նարեկ Գուրուրյանին Ռուսաստանից Ղազախստանին հանձնելը բխում է 2 երկրների քաղաքական հարաբերությունների բարձր մակարդակից, եւ Մոսկվան այն չէր փչացնի»,- նշեց իրավապաշտպանը:
Լարիսա Ալավերդյանը հավելեց, որ ըստ միջազգային նորմերի՝ Ղազախստանը պարտավոր չէ Նարեկ Գուրուրյանին Հայաստանին հանձնել, սակայն նման որոշում կարող է ընդունվել բանակցությունների արդյունքում: «Դրանից բացի, դատավճռի կայացումից հետո հնարավորություն կլինի դիմելու Ղազախստանի իշխանություններին՝ դատապարտյալին հանձնելու նպատակով, որպեսզի նա իր պատիժը շարունակի հայրենիքում կրել»,- ասաց ՀԿ ղեկավարը:
Իրավապաշտպանը նշեց, որ ամեն դեպքում հայ իրավապահներն ու փաստաբանները հնարավորություն կունենան մեկնելու Ղազախստան եւ մինչդատական ու դատական քննության ժամանակ ներկայացնելու Հայաստանի քաղաքացու շահերը:
Հիշեցնենք, որ հունվարի 1-ի գիշերը Կարագանդայի «Հին Հռոմ» ռեստորանի մոտ տեղի է ունեցել երիտասարդների ծեծկռտուք, որի հետեւանքով 23-ամյա ղազախ է սպանվել: Խուլիգանական գործողությունների եւ սպանության կատարման մեջ կասկածվող Հայաստանի քաղաքացի Նարեկ Գուրուրյանը հունվարի 9-ին ձերբակալվել է:
