Այսքան օրը տեսնելով, հասկանալով, մեկը մեկին ճանաչելով, որ մենք երկուսով ընդդիմություն ենք, պետք է լիարժեք հարցերը քննարկենք, որ միասնական հարցերը բարձրացնենք, ամեն ինչ իր տեղը լինի: Այս մասին, այսօր՝ հունվարի 18-ին, ԱԺ-ում լրագրողների հետ զրույցում նշեց ԲՀԿ առաջնորդ Գագիկ Ծառուկյանը՝ անդրադառնալով դիտարկմանը, որ ԱԺ-ում տպավորություն է, որ ԲՀԿ-ն եւ «Լուսավոր Հայաստանը» միմյանց են ընդդիմություն, ոչ թե իշխանություններին:
Ծառուկյանի խոսքով, այն ծրագրերը, խոստումները, որ տվել են, պետք է իրականացնեն. «Մարդիկ 9 սպասել են ու դեռ սպասում են, որ լավ է լինելու, ես էլ եմ հավատում»:
Ինչ վերաբերում է Վատիկանում ՀՀ նախկին դեսպան Միքայել Մինասյանի հայտարարությանը, որ ԱԺ-ում ընդդիմություն չկա, խորհրդարանի ուժերը կից են իշխանությանը եւ ընդդիմությունը ձեւավորվելու է ԱԺ-ից դուրս, Ծառուկյանը չցանկացած անձնավորված խոսել, միայն ասաց. «Անվանական չեմ ասի, դուք ուզում եք Ծառուկյանին հունից հանեք, չեք կարող: Եթե որեւէ մեկը անվանական ԲՀԿ-ին ու Ծառուկյանին ասի... Այո, ԲՀԿ-ն աջակից է եղել հեղափոխությանը, պաշտպանել է ժողովրդի թեկնածու Նիկոլ Փաշինյանին: Մենք ժողովրդի ձայնն ենք լինելու: Մենք ոչ թե ցեխ ենք շպրտելու, այլ աջակցելու ենք, որ պարոն Փաշինյանն իր ներկայացրած ծրագիրն իրականություն դարձնի: Եթե որեւէ տեղ մի վնաս կլինի երկրին, ժողովրդին, տնտեսությանը, իհարկե, մենք դեմ ենք լինելու, մենք ներկայացնելու ենք մեր ծրագիրը:
Մենք կենտրոնամետ ուժ ենք, մենք ցանկությունն է, որ լինի տնտեսական հեղափոխություն, տնտեսությունը հզորանա: Մենք հազար խնդիր ունենք լուծելու, եթե ամեն մեկս մյուսի վրա պարապի, ստորակետ գտնի... կամ ասում են Ծառուկյանը չեկավ: Ձեր ցավը տանեմ, Ծառուկյանը 24 ժամ կապի մեջ ա, ցանկացած հարց քննարկում ենք»:
Դիտարկմանը, թե ինչու է ԲՀԿ-ին համարում կենտրոնամետ ուժ եւ խուսափում ընդդիմադիր լինելուց, Ծառուկյանն արձագանքեց. «Եթե իշխանության մեջ չես, ուրեմն ընդդիմություն ես: Իսկ ավելի ուժեղ, ավելի հզոր ընդդիմություն լինելը չեմ հասկանում»:
